Sinamsam dagiti operatiba ti Criminal Investigation and Detection Group (CIDG) ti agarup ₱75 a milion ti balorna a peke a sandalias a Crocs iti tallo nga agsisina a panangrautda iti Siudad ti Meycauayan iti Bulacan.
Uppat nga Intsik ti naarestar iti naiwayat nga operasion, a nabigbig a da Weibin, Zhenpan, Youding, ken Wang.
Segun ken ni Maj. Gen. Nicolas Torre III, daulo ti CIDG, agbalor iti ₱29.7 a milion ti peke a Crocs ti nasamsamda iti umuna a bodega, idinto nga agarup ₱27.7 ti balor dagiti natakuatanda iti maikadua a bodega, ken agdagup iti ₱18 a milion ti balor ti nasamsamda iti maikatlo a bodega.
Maidarum dagiti suspek iti National Prosecution Service gapu iti panaglabsingda iti Section 155 (Trademark Infringement) mainaig iti Section 170 ti R.A. 8293 (Intellectual Property Code of the Philippines) gapu iti panangusarda iti peke a brand a mangallilaw kadagiti aggatgatang. (Aaron Recuenco/Manila Bulletin//Lito Hilidon/Bannawag)
