Agtalinaed ti Filipinas a kumanunong iti Ukraine iti isyu ti gubat ti Ukraine ken Russia, gapuna maysa ti Filipinas kadagiti nasion nga immanamong iti resolusion ti United Nations (UN) a mangkiddaw iti pannakapapanaw ti militar ti Russia iti Ukraine, kinuna ni Sekretario ti Department of Foreign Affairs (DFA) Enrique Manalo.

Iti maysa nga interbiu iti NewsWatch PH sumagmamano nga aldaw kalpasan ti kontrobersial a panagtaripnong da Presidente ti Estados Unidos (US) Donald Trump ken Presidente ti Ukraine Volodymyr Zelenskyy iti White House, kinuna ni Manalo nga agtalinaed ti takder ti Filipinas iti gubat iti Ukraine uray kimmanunong ti nabayagen a kaaliadona a US iti Russia.

Segun ken ni Manalo, suportaran ti Filipinas ti kangrunaan a prinsipio ti sangalubongan a linteg ken ti paglintegan ti UN.

Nakuna daytoy ni Manalo kalpasan a sinupiat ti US ti resolusion nga inaramid ti Europa iti UN General Assembly (UNGA) idi Martes, Pebrero 25, a nangipakita iti pakaseknan iti naan-anay a panangraut ti Russia iti Ukraine iti las-ud ti tallon a tawen nga agtultuloy a makaapektar saan laeng a para iti Ukraine, no di pay ket kadagiti dadduma a rehion iti sangalubongan a seguridad.

Nasional

Polis a wanted iti panagrames, natiliw kalpasan ti ilalasatna iti EDSA busway

Inkalikagum pay ti nasao a resolusion ti madagdagus nga ipapanawen ti amin a puersa militar ti Russia iti Ukraine ken ti "madagdagus a pannakaisardeng ti panangbusbusor ti Russian Federation kontra iti Ukraine."

Daytoy ti umuna a gundaway a sumiasi ti US iti kaaliadona a Filipinas ken Europa iti panangsuportar iti integridad ti teritorio ti Ukraine iti UNGA.

Imbes a suportaranna dagiti nasao a resolusion, nangidatag ketdi ti US iti UN Security Council iti sabali a resolusion a mangkidkiddaw a maisardeng ti gubat ngem dina met kinondenar ti panangraut ti Russia iti Ukraine. Inanamongan ti 10 a pagilian daytoy a resolusion, ngem saan a nairaman dagiti kaaliado ti US a United Kingdom ken France.

Ti Russia ken US ket permanente a kameng ti UN Security Council. (Raymund Antonio/Manila Bulletin//Lito Hilidon/Bannawag)