Impakaammo ti Department of Foreign Affairs (DFA) ita nga aldaw, Marso 7, ti isasarungkar iti Filipinas ti Secretary of State for Foreign, Commonwealth, and Development Affairs ti United Kingdom (UK) a ni David Lammy inton Marso 8.
Manamnama nga iti isasarungkar ni Secretary Lammy, mapatibker ti panagkadua ti Filipinas ken UK, a nairusat idi 2021 babaen ti Joint Framework of the Enhanced Partnership, ken mangpasingked iti relasion dagiti dua a pagilian.
Iti maysa nga aldaw a isasarungkarna, makitaripnong ni Lammy ken ni Presidente Marcos Jr., ken da Sekretario ti DFA Enrique Manalo, Sekretario ti Department of Defense (DND) Gilberto Teodoro, ken dagiti opisial ti Philippine Coast Guard ken Department of Social Welfare and Development (DSWD).
Manamnama a repasuen da Lammy ken Manalo ti maipapan iti panagtinnulong iti nadumaduma a paset ti Enhanced Partnership, kas iti panagnegosio ken panagpuonan, panangdepensa, maritime, climate change ken ti aglawlaw, agraman ti siensia ken teknolohia. (Betheena Unite/Manila Bulletin//Lito Hilidon/Bannawag)
