Imbilin ni Presidente Ferdinand Marcos Jr. ti pannkaimbestigar ti mapapati a panagsubli manen ti ‘tanim-bala’ scam iti eropuerto kasta met kadagiti opisial ti imigrasion a naipadamag a timmulong it panaglibas ti maysa a pugante a taga-South Korea.
Iti maysa a press briefing ita a Lunes, Marso 10, kinuna ni Palace Press Officer ken Communication Undersecretary Claire Castro a kayat ti Presidente a maammuan ti kinaagpayso ti mapapati a 'tanim-bala' wenno pannakaiseksek ti bala ti paltog iti bagahe dagiti pasahero iti Ninoy Aquino International Airport (NAIA) Terminal 3 itay napan a lawas.
"Saan a nasayaat no mapasamak manen ti kastoy," kinuna ni Castro, "aglalo no ti biktimaenda ket turista wenno padatayo a Filipino."
Segun ken ni Castro, saan nga ipalubos ni Presidente Marcos nga agtultuloy ti kastoy nga aramid.
"Isu a paim-imbestigar a talaga daytoy ti Presidente babaen ti tulong ni DOTr (Department of Transportation) Secretary Vince Dizon," kinunana. "Masapul nga adda madusa kapasan ti naan-anay nga imbestigasion," innayonna.
Pannakaiparang dagiti dokumento iti banko, buis, ken AMLC ni VP Duterte, inanamongan ti impeachment court ti Senado
Kinuna met ni Dizon nga inikkaten ti DOTr dagiti tallo nga empleado ti Office of Transportation Security (OTS) a mapapati a nairaman iti 'tanim-bala'.
Kinuna ni Dizon a maipila ti umno nga administrative charges, bayat a maur-uray ti naan-anay nga imbestigasion.
Kabayatanna, idi nasaludsod ti maipapan kadagiti kameng ti Bureau of Immigration (BI) a mapapati a timmulong iti maysa a pugante a South Korean tapno makalibas, kinuna ni Castro nga imbilin metten ni Marcos ti imbestigasion iti daytoy.
"Saan a palabsen ti Presidente ti ania man nga anomalia," kinuna ni Castro.
Kinuna ni BI Spokesperson Dana Krizia Sandoval idi napan a lawas a maysa a drayber ken dua nga escort manipud iti BI ti naisaklang iti Department of Justice (DOJ) gapu iti mapapati a panangtulongda iti panaglibas ni Na Ikhyeon, 38, nga inarestar ti BI idi 2023. (Argyll Cyrus Geducos/MB)
