Impaganetget ti Malakanyang a saan a pudno dagiti pammabasol a napaidaman kadagiti kangrunaan a karbenganna ken "nakidnap" pay ni dati a presidente Rodrigo Duterte idi naipaima daytoy iti International Criminal Court (ICC) idi Martes, Marso 11.
Kinuna ni undersecretary ti Presidential Communications Office (PCO) Claire Castro itay Marso 12 a sinurot ti gobierno ti linteg nupay naisangsangayan koma daytoy a kaso ta daytoy ti umuna a gundaway a tiniliw ti maysa nga internasional a korte ti maysa a dati a presidente ti Filipinas.
Segun ken ni Castro, maitunos ti inakem ti gobierno iti Republic Act No. 9851, wenno ti Philippine Act on Crimes Against International Humanitarian Law, Genocide, and Other Crimes Against Humanity. Dinakamatna ti Section 17 nga agkunkuna a mabalin nga isuko wenno ipa-extradite dagiti autoridad dagiti tattao a suspek wenno akusado iti Filipinas kadagiti umisu nga international court, no adda man, wenno iti sabali pay nga Estado (pagilian) kas sagudayen dagiti mayaplay a linteg wenno tulag ti extradition.
Sinupiat ni Castro ti ibagbaga ti pamilia ni Duterte a "kinidnap" ti gobierno ti dati a presidente, ket inlawlawagna a saan a maibilang a panangkidnap ti napasamak ta adda warrant of arrest nga impaulog ti autoridad, wenno ti korte.
Polis a wanted iti panagrames, natiliw kalpasan ti ilalasatna iti EDSA busway
Impaganetget ni Castro a naipaayan iti umisu a pannakataripato ni Duterte ta adda doktor, nars, ken abogado a kadua daytoy iti Villamor Airbase.
Segun kadagiti doktor a nangtaming ken ni Duterte, saan met a kritikal ti kasasaadna isu a saan a masapul a maipan daytoy iti ospital. (Argyll Cyrus Geducos/Manila Bulletin//Lito Hilidon/Bannawag)
