Patien ti Malakanyang nga awanen mamaayna ti impila ni Veronica "Kitty" Duterte a petision iti habeas corpus iti Korte Suprema tapno mapasubli iti pagilian ti amana a ni dati a presidente Rodrigo Duterte, ta addan daytoy iti Netherlands.
Daytoy ti kinuna ni undersecretary ti Presidential Communications Office (PCO) Claire Castro kalpasan a dimmatag da Veronica ken Atty. Salvador Panelo iti Korte Suprema (SC) ita a Mierkoles, Marso 12.
Kinuna ni Castro a kadawyan kadagiti kaso ti habeas corpus, no ti nadakamat a tao ket nairuaren iti pagilian, agbalinen daytoy a moot and academic. Ngem inlawlawag ni Castro nga adda latta iti SC ti pangngeddeng.
Anamongan daytoy ti maysa kadagiti abogado ni Duterte a ni Silvestre Bello III, a kinunana a saanen a maipakat ti habeas corpus ken ti temporary restraining order (TRO) tapno malapdan koma ti pannakakemmeg ni Duterte ta awan met impaulog ti SC a manglapped iti daytoy.
Polis a wanted iti panagrames, natiliw kalpasan ti ilalasatna iti EDSA busway
Impila da Panelo ken ti anakna a ni Atty. Salvador Paolo Jr. ti nasao a petision ni Veronica Duterte kontra iti gobierno ti Filipinas gapu iti "panangipupok, panangkidnap, ken panangisukoda" ken ni Duterte iti ganggannaet.
Naarestar ni Duterte itay Marso 11 kalpasan nga inruar ti International Criminal Court (ICC) ti warrant of arrest kontra iti dati a presidente, sa naibiahe a dagus iti The Hague, Netherlands iti karabianna. (Argyll Cyrus Geducos/Manila Bulletin//Lito Hilidon/Bannawag)
