Pappapigsaen ni Deputy Speaker ken Las Piñas Rep. Camille Villar ti pannakilangenna kadagiti agtutubo a botante babaen ti panangipaganetgetna ti panagkumitna kadagiti lehislatibo a reporma a pakabenepisiaran dagiti grassroots community ken mailanglangi a sektor.
Iti panagsaritana iti taripnong dagiti kameng ti Liga ng mga Barangay Romblon Chapter iti Cebu City idi Mierkoles, Marso 5, pinasingkedan ni Villar ti dedikasionna a mangisayangkat kadagiti addang a mangpasayaat iti pagimbagan dagiti barangay worker. Binigbigna ti napateg nga akemda iti panangsigurado iti nasigo a pannakaipaay dagiti serbisio ti gobierno iti agpang ti komunidad.
“Makitak ken maawatak dagiti karit a sangsanguenyo iti inaldaw. Paratignayko dayta tapno igagaedko pay ti agtrabaho nga agserbi iti publiko,” kinuna ni Villar. Intampokna pay ti sirmatana a mangyeg kadagiti baro nga idea iti Senado, a mangibagi iti henerasion a milenial kabayatan a raemenna ti sirib dagiti beterano a mammanday-linteg.
Iti edadna a 40, patien ni Villar a maitunos ti perspektibana kadagiti kasapulan ti dumakdakkel a sektor dagiti agtutubo iti pagilian, a buklen ti agarup 70 a porsiento ti 115 a milion a populasion ti pagilian, segun iti datos ti World Health Organization.
Nora Aunor, 71, pimmusay
Sakbayna, nakitaripnong ni Villar kadagiti lider ti barangay iti Iloilo ken Palawan ken nakilangen pay kadagiti pannakabagi dagiti mailanglangi a komunidad. Idiay Capiz, inulitna ti pannakaiganetget para iti naing-inget a pannakaipatungpal dagiti linteg a mangsalaknib kadagiti mannalon manipud kadagiti saan a patas nga aramid iti panagtagilako ken pananggundaway iti ekonomia.
“Adu dagiti napintas ti pannakapandayna a linteg, ngem masapul nga epektibo a maipatungpal dagitoy,” kinunana, a dinakamatna ti Anti-Economic Sabotage Law a kas pagarigan.
No mabotosan iti Senado iti masungad a midterm elections, inkari ni Villar a ma-maximize ti oversight functions ti Senado tapno masigurado ti umno a pannakaipatungpal dagiti linteg a mainaig iti agrikultura, pannakalapped ti panagkunniber, ken kadagiti annuroten ti ekonomia.
Iti 15 a tawenen a padasna iti publiko ken pribado a sektor, inyebkas ni Villar a natalek iti kabaelanna a makaipaay iti ad-adu pay a napapateg a reporma. “Adun ti naaramidan, ngem ad-adu pay ti masapul nga aramidentayo,” indeklararna.
