Naammuan iti resulta ti surbey ti Social Weather Stations (SWS) a kinomision ti Stratbase Consultancy a kaaduan a Filipino ti sumarurong a rumbeng nga agsungbat ni dati a presidente Rodrigo Duterte kadagiti pammapatay a mainaig iti illegal a droga kabayatan ti administrasionna.
Natakuatan iti surbey, a naisayangkat manipud Pebrero 15 agingga 19, nga immanamong ti 51 a porsiento kadagiti napagsaludsodan a rumbeng nga agsungbat ni Duterte dagitoy a pammapatay. Iti daytoy a grupo, 32 a porsiento ti "umanamong la unay" ken 19 a porsiento ti "medio umanamong."
Kabayatanna, 25 porsiento kadagiti napagsaludsodan ti saan nga umanamong, a 16 porsiento ti "saan a pulos umanamong" ken 9 a porsiento ti "medio saan nga umanamong."
Sabali pay a 14 a porsiento ti “saan a makadesision” no umanamong wenno saan, idinto ta 10 a porsiento ti nagkuna a “saan nga umdas ti ammoda tapno mangted iti kapanunotan.”
Dip. Paolo Duterte, napalubosan nga agbiahe iti 17 a pagilian
Nairaman ti Stratbase-SWS February 2025 National Survey ti rupanrupa nga interbiu kadagiti 1,800 a rehistrado a botante iti entero a pagilian: 300 a napagsaludsodan manipud iti Metro Manila, 900 manipud iti Balance Luzon (wenno Luzon iti ruar ti Metro Manila), 300 manipud iti Visayas, ken 300 manipud Mindanao.
Nairuar ti resulta ti surbey idi Marso 19, sumagmamano la nga aldaw kalpasan ti pannakaarestar ni Duterte idi Marso 11 iti Ninoy Aquino International Airport, kalpasan ti panagsublina manipud Hong Kong.
Naiwayat ti pannakaarestar maibatay iti warrant manipud iti International Criminal Court, a mangim-imbestigar kadagiti alegasion a “crimes against humanity” bayat ti kontrobersial a “war on drugs” nga inwayat ti administrasionna. (Ellalyn De Vera-Ruiz/MB)
