Binabalaw ti Palasio ti Malakanyang dagiti sentimiento a mangidildilig ken ni dati a presidente Rodrigo Duterte ken iti pimmusay a senador a ni Benigno "Ninoy" Aquino Jr., a kunana nga awan ti pakaibatayan dagiti maipagarup a pangta iti biag ni Duterte.
Daytoy ti kinuna ni undersectary ti Communications Office Claire Castro kalpasan a naipadamag nga imbaga ni Bise Presidente Sara Duterte iti amana, nga adda iti kustodia ti International Criminal Court (ICC) iti The Hague, nga agbalin a kas ken ni Ninoy a napapatay iti panagsublina iti Manila manipud iti pannakaidestierona iti Amerika.
"Awanan kinapudno dayta," kinuna ni Castro iti press briefing ita a Lunes, Marso 24.
Masmasdaaw met ti press officer ti Palasion no sadino ti naggapgapuan ti maipagarup a pangta iti biag ti dati a presidente.
"Naggapuan dagita a pangta? Kinapudnona, uray dagiti maibagbaga a pangta kontra ken ni Bise Presidente Sara Duterte ket saan pay a naidatag iti National Bureau of Investigation ken iti Philippine National Police," kinuna ni Castro.
Senador Marcoleta, maipan iti ospital ti PNP
"Masapultayo dagiti materiales, dagiti ebidensia, sakbay nga aramidentayo dagiti kakastoy a klase ti statement," innayonna.
Segun ken ni Castro, saan koma a maidilig ni dati a presidente Duterte iti pimmusay a senador ta awan a pulos ti nagpadaanda, nangruna no maipapan kadagiti isyu a nakainaiganda.
"Adayo la unay a maidilig ni dati a presidente Duterte ken ni Ninoy Aquino, a pulos a di naaddaan iti ania man a rekord ti mass murder wenno krimen kontra iti sangkatawan," kinunana.
Impalagip ni Castro nga inyarig ni Duterte ti bagina iti pimmusay a diktador a ni Adolf Hitler.
"Isu a mismo ti nangibaga, a kunana 'Minasaker ni Hitler ti tallo a milion--' kinapudnona--6 a milion 'a Hudio. Ita adda tallo a milion, ania daytoy? Tallo a milion nga adik iti droga iti Filipinas? Adda. Maragsakanak a mangpapatay kadakuada. At least, no addaan ti Germany iti Hitler, addaan met ti Filipinas iti kas kaniak,'" kinuna ni Castro. "Amang a kinaykayat ni dati a presidente Duterte nga idilig ti bagbagina ken ni Hitler." (Argyll Cyrus Geducos/MANILA BULLETIN)
