NO adda “One Town, One Product,” adda met “One Barangay, One Product.” Iti biang ti Brgy. Mabaleng, Siudad ti Batac, ti camote chips ti ipagpampannakkelda a produkto. Isu daytoy ti “opisial” a produkto ti barangay.

“Tawen 2012 idi nainaw ti panagaramidmi iti camote chips,” panangistoria ni Imelda N. Cabanatan, agpapaay idi a kapitan ti Brgy. Mabaleng, nga itan, isun ti presidente ti Mabaleng Food Processors Association. “Kas umuna nga addang, kiniddawmi iti Mariano Marcos State University (MMSU) babaen ti City Agriculture Office tapno masursuruankami no kasano ti agaramid iti camote chips.”

Camote chips a produkto ti Mabaleng Food Processsors Association.

Naaramid a kasta, ket malaksid iti pannakasanayda nga agaramid iti camote chips, naikkanda pay kadagiti nadumaduma ti baraytina a kamote (kaong, kamotig) nga isu ti immulada tapno adda latta pagalaanda iti aramidenda a camote chips.

“In-inut met a nayam-ammomi iti merkado ti produktomi. Aglakokami kadagiti sari-sari store agraman kadagiti eskuela iti Siudad ti Batac.  Bassit-bassit ngem mangted met iti nayon a pamastrekan kadagiti miembro nangruna kadagiti inna iti pagtaengan nga awan pagsapulanna.”

Kolum

TULONG ITI MANNALON: Alisto a Pamastrekan ti Panagmula iti Kamotig

Simmayaat ti negosioda. Ti  dati nga ar-aramidenda a garlic ken cheese-flavored camote chips, nanayonan iti sweet-flavored camote chips kalpasan ti panangsanay manen kadakuada ti MMSU.

Ni Imelda N. Cabanatan ti Brgy. Mabaleng, Siudad ti Batac, kaduana ti maysa kadagiti nagmula iti kamote iti lugarda.

Kas iti padas dagiti dadduma nga agiprosproseso, adda met tiempo a nagproblema ti gunglo iti iprosesoda nangruna idi immadu ti suplayanda nangruna no madanonan ti Disiembre a makaaramidda pay iti di nakurkurang ngem 10,000 a pakete.  Aglakoda pay kadagiti trade fair ken Kadiwa ng Pangulo.

“Talaga a dakkel idi a problemami ti pagalaanmi iti bagas ti kamotig nga iprosesomi. Makadandanonkami pay idi idiay Pangasinan nga agsapul iti bagas ti kamotig!” kinuna ni Ma’am Imelda.

Dagiti agserserbi iti MMSU ken sumagmamano kadagiti kameng ti Mabaleng Food Processors Association.

Kas maysa a solusion, nagpamulada iti kamote kadagiti mannalon iti lugarda. Ita, adudan nga agmulmula iti kamote iti lugarda. Nagawisda pay kadagiti mannalon a kayatna ti agmiembro tapno isuda ti mangsuplay iti kasapulan ti gunglo a bagas ti kamote.–O