Mabalin a saan a mapasamak ti temporario a pannakawayawaya ni dati a presidente Rodrigo Duterte ta taktakderan ti gobierno nga awanan iti hurisdiksion ti International Criminal Court (ICC) iti Filipinas.
Daytoy ti kinuna ni Communications Undersecretary Claire Castro kalpasan nga imbaga ti maysa a pannakangiwat ti ICC nga ipalubos ti korte ti interim release ni Duterte no la ket umanamong ti Filipinas iti daytoy ken iti sumagmamano a pagannurotan ken kondision nga ikeddeng ti ICC.
Iti press briefing ita a Huebes, Marso 27, kinuna ti press officer ti Malakanyang a no aramiden dayta ti Filipinas kaipapananna akseptaren ti Filipinas nga adda hurisdiksion ti ICC iti pagilian.
"Kayatna kadi a sawen a masapul a bigbigentayo nga addaan hurisdiksion ti ICC iti Filipinas? Patiek a kidkiddawen ken idawdawat ti pamilia ni dati a Presidente Duterte iti Korte Suprema a saan koma a makitinnulong ti gobierno iti ICC," kinuna ni Castro.
Balikatan Exercise ti Filipinas, US, marugian ita nga aldaw
"Ngarud, kayatna a sawen a no saantayo a makitinnulong iti ICC, uray dayta a dawat wenno uray dayta a manipestasion ti ICC, saantayo a bigbigen a kasta dayta" innayonna.
Segun ken ni Castro, ti panangawat iti interim release ni Duterte ket mabalin a manggubuay iti komplikasion.
"Maluktan amin nga isyu ditan. Maipalgak met no addanto freeze order kadagiti assets (ni Duterte)," kinuna ni Castro.
"Kayat kadi met ti pamilia Duterte a makitinnulongtayo iti ICC para iti amin a sanikuada, nailemmeng man wenno saan... tapno maduktalan amin a sanikuada?" innayonna.
Kinuna ni Castro a ti panangakseptar kadagiti kondision ti ICC, kontraenna pay ti pagtaktakderan ti kampo ni Duterte nga awanan hurisdiksion ti ICC iti Filipinas.
Natiliw ni Duterte ken naisuko iti ICC idi Marso 11 gapu iti mapapati a krimen kontra iti sangkatawan nga insayangkatna kabayatan ti inwayatna a drug war. (Argyll Cyrus Geducos/MB)
