ADU TI LADAWAN nga agsublisubli iti lagipko iti ipapanawko iti Mecca a nagbedngan ti California ken Mexico, ken iti panagdaliasatko nga agturong iti Salt Lake City a baro a lubong a pakigasanggasatak. Kas man la addaak iti tangatang a mangtantan-aw iti pakabuklan ti Mecca a nakayaplagan ti nalawa a plantasaion ti asparagos, mandarin, sandia, ubas, ken dadduma pay a muyong nga agbiag iti disierto. Saggaysa pay la idi dagidi pandaka a balbalay, ken madama idi a mabangbangon ti dua kadsaaran a balay nga impabalay daydi Nana Felicing Baldovino kada Marilou ken ni Frank Ramos. Ti baket ti nangorder ken ni Marilou babaen ti panangirekomenda daydi Apo Rosa a kabsat ni Marilou iti ama a Barbers, a kanagnagan daydi Anti Rosa.
Iti puseg ti Mecca ti nagunnatan daydi bunggalo a nangibatiak iti daydi tatang ken ti maikadua a pamiliana a ni Norma ken dagiti tallo a nagsanguanda a da Mercy, Murmuray, ken Mildred.
ALLON TI BIAG: Walo A Dekada A Panagdaliasat (39) 2
Nailet ti kuarto iti amianan a murdong daydi bunggalo nga agarup nagkurinikonan ti pamilia daydi tatang. Adu pay ti gamigam a napempen. Dandani awan ti pagpisipisanda. Masansan nga ireklamo daydi tatang ken ni Norma ti rigatda a makibagay iti pamilia a sinangpetanda; dina la maiparupa kaniak a biddut daydi pananguy-uyotko kadakuada nga umay iti America. Saan la ngamin a ni Marilou ti nasken a pakibagayanda. Kasda la kano saan a makaanges no adda ni Mico nga anak daydi Nana Felicing. Nupay adda balayda iti lugar dagiti babaknang iti amianan ti Indio a yan da Miguela ken daydi Anti Rosa, daydi bunggalo ti inaramid ni Mico nga opisinana no agsingir iti upa dagiti trailer-da, ken no panagbabayadan iti buis. No addada amin, pati dagiti annak ni Mico iti asawana nga ikitna pay, malipatandan a mamimpinsan ti pamilia daydi tatang. Mabisbisinanda kano ta yurayda pay a makapanaw dagiti akimbalay sakbay a makapangrabiida iti naladawen a sardam. Kanayon kano a kasta.
“Nasaysayaat ti biagmi idi addakami idiay Santa Maria!” kinuna ni Norma iti naminsan. “Uray narigat ti biagmi, dimi napadpadasan ti nabisbisinan!”
Simmippayot met iti lagipko daydi panangisursurok ken ni Mercy a nagmaneho. Nagaradgadan ti bakrang daydi Batman-ko ta impasaksakna iti kaubasan... Diak naitugot iti Utah daydi kotsek ta diak ammo ti rota; awan pay idi ti GPS. Inlako kano ni Marilou iti $500 idi agangay.
Diakon innala ti naglakuanna.
Makitkitak met daydi naminsan a pannakisarita kaniak ni Brenda a balasang ni Marilou. Naagapadna ti panggep ni nanangna a mangyasawa kenkuana ken ni James a baro ni Francia a kabagis ni nanangna nga adda idi idiay Pudtol, Kalinga Apayao. Iti daydi a kanito, immapay iti lagipko daydi singasing ni Marilou a panangisinak ken ni Sinamar ta yasawanak iti sabali idiay Indio tapno nadardaras ti pannakapagindegko iti America. Kasdi ti panggep ni Marilou ken ni Brenda tapno kano nadardaras a makaumay ni James iti America, ta isu ti namnamada a makatulong iti pamiliada, uray no dida mabisbisinan idiay Pudtol ta uray kaskasano, adda met dagada. Diak imbagbaga ken ni Marilou ti naisaw-at ni Brenda.
Ngem saan a natuloy daydi a panggep. Nakalpas ni Brenda iti adalna ket nasayaat itan ti biagda iti lakayna a Puraw, ken dua a bungada, idiay Berkely, California.
Irapinko man ti lagipko iti daydi lakay nga Ilokano a nagupa iti maysa kadagidi trailer ti amo ni Marilou iti asideg daydi bunggalo. Saan ngamin a mapunas iti lagipko daydi nakalidliday ti rupana a lakay.
“Komustakayo, tata?” kinunak iti naminsan a panagranami.
“Agur-uray iti ilelennek ti init!” parpar ti timekna.
“Yan ti pamiliam?”
“Sisiak nga agbibiag.”
“Dikay mailiw ‘diay Filipinas?”
“Napalalo.”
“Diyo kayat ti agawid?”
“Awan ti pamiliak a sangpetak. Nagtalawen dagidi dudua a kakabsatko idiay lugarmi; diak ammo a suli ti lubong ti yandan.”
Nasagid ti riknak. Naidiligko ti bagik iti daydi a lakay. Adda la ketdi met arapaapna idi isu nga immay iti America, ngem nagpatinggaan daydi nga arapaap? Siak, addaakon iti America. Iti daydi a panawen, impagarupko a magawgaw-atkon ti arapaapko. Wen, impapanko a magawgaw-atkon ti balligi!
“It’s the place,” kinuna ni Bart Wiscombe idi misionario pay laeng nga immay nanursuro idiay Amorsolo.
“It’s the place,” inuliltko idi iti nakemko. “I want to go there!”
Agpayso ngata a ti Salt Lake City ti napili a lugar?
Ngem, ala, kasdi ti kasasaad daydi tatang ken ti maikadua a pamilliana sakbay a nakaakarda iti trailer a pinaupaan ni Marilou iti asideg ti kabangbangon a balayda.
Imbagak iti daydi tatang a kitaek no addanto gundawayda a sumurot iti Salt Lake City.
Wen, ti Salt Lake City. Awan ti makitkitak ita, a makitkitak idi, no di ti Doubletree Hotel nga immuna a nagturogak idi immayak nagatendar iti sapasap a komperensia ti pammati. Ken ti estasion ti Greyhound Bus Line nga adda pay la idi iti Downtown Salt Lake City. Uray mariknak ti napalaus a pananglapped ni Marilou iti ipapanawko, inggatangannak pay laeng iti tiketko.
Kas pay la marikriknak ita ti utoyko a nagbiahe iti nasurok a maysa nga aldaw—nagluasak iti alas 3:20 iti malem ti Oktubre 4 ket nakadanonak iti 4:50 iti malem iti sumuno nga aldaw. Simmangpetak a nagbakruy iti nabuslon a namnama. Makitkitak daytan uray pay idi agkarasardeng iti nadumaduma nga estasion daydi nagasat a lugan a nangisangpet kaniak iti Salt Lake City a baro a lubongko.
Ha-ha! Wen, saanak a naib-ibusan iti namnama! Count your blessings, kuna ‘tay maysa a himno.
Ket, wen, nakaragragsak ni Bart Wiscombe a nangsabat kaniak iti estasion ti Greyhound—ulitek man ditoy nga espesial ti Greyhound idiay Saudi; isu ti lugan dagiti empleado ti ARAMCO a mapan kadagiti sabali a siudad a sakup ti kompania. Isu latta daydi Bart Wiscombe a nakarimrimat dagiti matana idi damomi ti agsarang idiay Amorsolo, UP Low Cost Housing. Inarakupnak iti nairut.
“Welcome to Salt Lake City!” kinunana.
“The promised land?” kinunak. Adda iti likud ti panunotko dagidi pioneer a miembro a nagkamang iti Salt Lake idi pinapanaw ida dagiti kabusor ti pammati idiay New York.
Nagkatawa; kinitanak iti napigket.
Tinulongannak a nangikarga kadagiti gargaretko iti luganna a van. Kasla saan a mabannog nga agdamdamag ken agis-istoria idi agtartarayen ti luganna iti agpaabagatan a Redwood Road. Lima kanon ti annakda ken ni Venetta; uppat ti tawen ti buridekda.
Sakbay nga inyawidnak iti 5134 W Chippewa Place, a sakup pay la idi ti Salt Lake City sakbay a nabukel ti West Valley City, indagasnak iti maysa a panganan iti nagsulian ti 3500 South ken Redwood Road iti West Valley.
Naragsak ni Venetta a nangpasangbay kaniak. Kasla metten am-ammodak dagiti ubbingda iti kinapasigda a simmarabo.
Nabaknang ti pangrabii a nagsasanguanmi iti nalawa a kosinada. Nagpalpaanmi ti nagsasarita iti salas. Nagbalin a silulukat a libro ti biagko, ken ti biagda. Ammoda a mannuratkami ken ni Sinamar ta inikkanmi ni Bart iti kopia ti immuna a librok a “Pakpakawan, Berde! Ken 22 a Napili a Sarita” idi nagawid kalpasan ti misionna. Inistoria dagiti agassawa ti panagtugmok ti biagda.
“Before going to the Philippines for a mission,” kinuna ni Bart, “I had a girlfriend whom I promised to marry when I get back.”
Ngem di pay nakagudua iti mision idi nadamagna a nangasawan ti nobiana.
Idi simmangpet, nasirpatna ni Venetta ket isu ti indatagna iti altar. Nagbunga iti innem ti pinnategda, agingga a napili ni Bart a Bishop ti Ward a yanda.
Nadekket da Marlo wenno Jojo ken ni Heidi nga inauna nga anakda. Nagkanta pay idi despedida ni Jojo a mapan agmision idiay Hawaii. Ngem inungtan ni Chichi; kas la kano ngamin agkabsatda ket saan a mabalin nga armenna... isu a nagsinnirpat da Jojo ken ni Marcella idi agbasbasada iti computer science. Saan a napintas ti nagbanagan ti ayat ni Heidi ket ipapanko a gapu iti saan a natuloy a pinnaludipda ken ni Jojo.
Nairana a General Conference idi simmangpetak iti Salt Lake City ket inawisdak a nagatendar iti kapilia ti Granger 10th Ward da Bart a nakaibrodkasan ti Saturday Session ti komperensia.
“He is a member of my golden family in the Philippines!” napnuan pannakkel ni Bart a nangyam-ammo kaniak kadagiti miembro ti Ward. Impadamagna ti liderato a nagtaktakemak idiay Filipinas.
“Welcome to Utah!” nabara ti panangsarabo dagiti miembro kaniak.
Iti rabii, inawagak ni Delia Rochon a tubo ti Sud America ngem addan iti Bountiful. Kameng idi iti Marikina Philippines Stake bayat ti kaaddana idiay Filipinas. Ken gayyem ni Hubertalina Camba a presidente idi ti Stake Relief Society ti Marikina Philippines Stake, a ni Sinamar ti First Councilor. Ipalagipko laeng, siak idi ti presidente ti Stake.
Impadamag ni Delia nga adda Filipino Fireside iti alas sais ti malem iti sumuno nga aldaw, Domingo, kalpasan ti komperensia, ket inawisnak. Kanayon nga adda panagtitipon dagiti Filipino ken dagiti nagmision iti Filipinas tunggal malpas ti General Conference, iti alas 6:00 iti malem. Binukel ni Aida Mattingley ti nasao a Fireside; isu ti nangiturong iti 38 a tawen.
Nailiw met ni Bart kadagiti Filipino ket simmurotda ken ni Venetta.
Kunam, napunno ti kongregasion iti Puraw nga im-immay nagmision idiay Filipinas, ken Filipino a naggapu pay iti sabsabali nga Estado ti America a pakaibilangan ti California. Dagidi dadduma, intarapnosdan ti nagatendar iti Fireside kalpasan ti panagatendarda iti General Conference idiay Taberncle—awan pay idi daydiay Conference Center. No kasano ti ragsak ni Bart a nakakita kadagidi am-ammona idiay Filipinas, kasta met kaniak, kadagidi nakadkaduak a lider. Nagkitakami met kadagidi agassawa a Parayno a taga-Pangasinan nga immuna a naam-ammok idi siak ti Translation Coordinator iti apagbiit a panawen; nakasinningedmi ida ken ni kaingungot idi agangay. Uray daydi Remi Mataoa a superbisormi iti panagipatarus idiay Filipinas. Ken ni John Ball a diak ammon ti yanna ta napan nangisuro idiay Peking University idiay Beijing, China idi naglusulos iti Finance Department nga immakaranna kalpasan ti Translation Department—pinadasko a sapulen iti Website ngem nagadu met ti kanagnaganna.
Naganas man ketdi ti riknam no makainnabrasaka iti kakudkudilmo iti ganggannaet a pagilian; a padam met ngata nga agdaldaliasat!
Iti kabigatanna, kinuyognak ni Bart a nagaplay iti nadumaduma nga opisina. Kinuyognak pay a nagimpormar maipanggep iti panangpasukat iti Drivers License idiay DMV. Masapul a sukatam ti lisensiam tunggal umakarka iti estado.
Daydi met nga aldaw a nangipaw-itak ken ni John Ball iti surat para ken ni Sinamar, ta napan idiay Filipinas a mangsarungkar kadagidi agipatpatarus a Filipino.
MALAGIPYO IDI SAKBAY a pimmanawak idiay Upland? Imbaga ni Nely Cabacungan Tuvera a naaprobaran ti pannaka-expedite wenno pannakaisapsapa ti petisionko kada Sinamar. Ti gapuna? Maika-21 a kasangay ni Chichi iti dos ti Enero iti sumuno a tawen. Sakbay a madanonna dayta a petsa, masapul nga addan ditoy America. Maikuyogna ni Sinamar ken dagiti kakabsatna nga ub-ubing ngem isu. Naipatpatang a ni la Jojo ti ub-ubing. Isu a talloda a nairaman iti nasao a petision. Aprobado met ti petisionko kada Lingling, Dondon, ken Mimi ngem saanda a mairaman a maisapsapa; maud-udida. Ken ad-adda pay a maitantan ti yaayda no mangasawada sakbay a makaumayda.
Ngem adda pay sabali a parikutko. Ket saan a sinsinan a parikut!
Masapul nga adda maipakitak a dokumento a mangpaneknek a kabaelak ida a taraknen bayat ti panagur-urayda iti green card a kasapulanda no agaplikarda iti trabaho. Ti yan ti adatna, diak pay idi nakastrek iti trabaho ditoy West Valley City. Ket nadungeten! Oktubre idin, mano a bulan laengen sakbay a dumteng ti plaso.
Nasken a makastrekak iti trabaho iti kasapaan a panawen. Isu nga inaldaw a rimmuarak nga agsapul. Diak sinamir ti bannogko a nagnagna, ken agbasbasa iti Classified Ads iti pagiwarnak.
Ngem inaldaw met a nagsubliak iti Chippewa Place nga agwidwidawid. Madanaganak unay idin.
Iti naminsan a panagsapsapulko iti trabaho, nakitak ti Chinese Gourmet iti sikigan ti 3500 South iti amianan, a batog ti kalsada a kumamang iti Chippewa Place. Agmatuon idin ket mabisinak unayen.
Linagipko no adda pay met la kuartak sakbay a simrekak. Agbayadka nga umuna iti counter sakbay a mapanka kadagiti eskaparate a nakaintaran dagiti taraon.
Agpilpiliak iti taraon idi kellaat nga adda nangtapik iti abagak.
“President Tabin!” naklaatak a nakakita ken ni Danilo Mabunga a maysa kadagidi Councilors-ko iti Burgos Branch a nagpresidenteak idi nai-release-ak nga Stake President ti Marikina. “Kelan pa kayo dito?”
Kaduana dagidi dadakkelda a Patriach Moises Mabunga ken Sister Mabunga—ipalagipko laeng, ni Patriach Mabunga ti nangted iti Patriachal Blessing kadakami nga agassawa—ken ni Moises Mabunga, Jr. a nag-bishop kano idiay New York, ken ni Ampy nga asawana. Ken tallo pay a babbai a kakabsatda. Naragsakda amin a nakakita kaniak.
Manager kano idi ni Moises Mabunga, Jr. iti custodial department ti simbaan. Idi a panawen, adda pay la empleado nga agdalus kadagiti pasdek ti simbaan. Adu ti pasdek ti simbaan iti Utah.
Impadamagko ti panagsapsapulko iti trabaho.
“Kung interesado ka, tawagan mo ako,” kinuna ni Moises Mabunga. Intedna ti teleponona.
Nalagipko daydi panagdaldalusko iti kasilia idiay Kalye Evangelista, Quiapo.
Nagyamanak; diak imbaga nga agsapulak iti sabali. Imbagak lattan nga awagakto.
Bayat ti pannakakumikomko, sinuratak met ni Sinamar ket inggunamgunamko ti panangasikasona kadagiti dokumento a masapul iti panagbiaheda. Ta pinatulodan idan ti imigrasion iti dokumento a pammaneknek iti pannakaaprobar ti yaayda. Masapul laeng ti kunak a dokumento nga aggapu kaniak.
Impadamag ni kaingungot nga idi damo, saan kano a mamati dagiti padana a mannursuro iti Quirino Elementary School iti Project 2, Quezon City. Ngem idi ipakitana ti surat a naggapu iti imigrasion, nasdaawda kano.
“Hala, ang suwerte mo naman! Anong ginawa ng mister mo? Kami, matagal nang naghihintay pero hanggang ngayon, wala pa!”
“Ang galing naman ng mister mo! Sabihin mo nga sa kanya at tulongan kami.”
“Ay, hindi na biro ito!” kinuna kano ni Esther a sekretaria ti prinsipal idi makitana ti surat. “Mag leave ka na at asikasuhin mo kaagad!”
Ammo da Bart ti parikutko. Tapno nalaklakak ti agsapul iti trabaho, kinuyognak ni Bart iti DMV a pangsukatak iti lisensiak. Masapul a masukatan ti lisensia tunggal umakarka iti estado; diak mausar iti Utah ti lisensia a naalak idiay California.
Pagpiaanna, nairuarko ti written exam a maspaul sakbay ti road test.
Ngem nabitogak iti immuna a road test! Agpasang-atak, ket nagdardarasak ta no makasang-atak, nalpasen ti pannubok. Diak nadlaw ti bassit a silaw iti kanigid, nga agarup nalingdan pay. Nakasindi iti nalabaga. Saanak a nagsardeng! Naspak ni rayaraya!
Iti maikadua a panangpadasko, naannayasen ti amin. Awan pay kinse a minuto, inikkandakon iti lisensia. Naan-anayakon a drayber ti Utah!
Idi Oktubre 16, 1996, sinuratak ni Sinamar ket adu ti impadamagko. Daytoy man ti paset ti suratko:
...kunak no napankan idiay immigration; nasken a surnadam dagiti papelyo tapno maasikaso a dagus. Nadungeten ti panawen, amangan no maabutankayo. Mano a lawas laengen. Diyon sa met kayat ti umay. Naibus ‘tay phone card-ko itay iti kauuray ti awagda kenka isu a naputed ti panagsaritata.
Adu ti kayatko itay nga isurat ngem nagloko daytoy makinilia nga inted ni Bart; mayat ti tugotna ngem natarakatak...
Adun ti nagaplikarak. Adda metten nang-interview kaniak. Saan a matuloy ti O.C. Tanner ta didak met inawagan. Ngem kas nakunak itay nagsaritata iti telepono, mangrugiakon no Oktubre 25 idiay Deseret Industries. Nababa laeng ti sueldo, ngem pangyur-urayak iti panangrugik idiay Post Office. Nangato idiay ken adu pay ti overtime... ken ti banag dagiti dadduma pay a nagaplikarak. Naimbag la a pangrugiak ditoy DI nga imatonan ti Simbaan, a paglakuan iti segunda mano nga indonar dagiti miembro.
Malaksid iti daytoy, innakto pay no bigat, Huebes, idiay California ta inawagannak ni Marylou. Adda kano sungbat daydi inaplikarak a nag-test-ak idiay Riverside County. Kunana ngamin a sukatanna ti pagpletek no awan ti kuartak. Kayatna a diak mayadayo iti yanda. Kayatna pay nga idiay ti pagtarusanyo. Adu kano ti trabaho nga agpaay kenka. Diak ammo, a, ta awan met ti nakitak idi. Ditoy Salt Lake City, adu ti trabaho. Adu pay ti tumulong. Ti la rigatna ti aguray iti resulta. Idiay Califonria awan ti kakastoy nga ahensia a tumulong. Naanus ti Church Employment a tumulong kadagiti miembro nga agsapul iti trabaho. Kinapudnona daytoy ti nangisapul iti serkak, wenno nangrugiak, a no makasarakakto iti nasaysayaat, nawayaakto a pumanaw iti yanda. Mangrugiak iti $6.50 per ora. Imbagak a masapulko ti lugan, ket kasla adda namnamak a maikkan, babaen ti tulong ti Bishop ditoy, ken ti bossko idiay DI...
Idarasyo dagita papelyo. Di met, aya, fly now pay later ken ni komadre Eden? Kayatko a maammuan no ania ti rotayo...
Subalitam a dagus ‘toy suratko tapno ammok ti aramidek...
Iti suratko idi Oktubre 23, impadamagko a nasurok a sangapulo a surat ti imbuson da tatang para iti nadumaduma a tattao, kas sungbat iti saludsod ni Sinamar. Imbagak nga adu ti makagapu no apay a dida met la agsuraten. Maammuandanto ti gapu no addadan ditoy.
Kanayon a kuarta ti problemata—kaanonto a ditan agproblema iti kuarta?
Paset dayta ti suratko ken ni Sinamar. Innayonko pay: saan kanon a masapul ti affidavit of supoort ta addaak metten ditoy, ken siak ti nangorder kadakayo. Basta ibagam dita immigration a mannuratak, nga isu ti inaprobaran ti immigration. Isu ngarud nga Alien with Extraordinary Ability.
Sadiri? Diak ammo, a, no mayat ta isu met ti nangyabaga iti yaay da tatang ditoy. Insalda ni Herman ti dagana idiay Sta. Maria kenkuana... Awan ti mabalinko nga utangan ditoy ta nautangak aminen, ket diak pay nakapangrugi nga agbayad. Saak la ngata maaddaan iti kuarta no pagmilagruen ni Lord. Sapay koma ta malakom dayta lote dita Amityville, no nainagan pay la kadata...
Impabulod da Bart ti maysa a kotseda nga usarek nga agsapul iti trabaho. Diak mabilang ti nagaplikarak. Inrekomendarnak pay ni Bart iti O. C. Tanner a pagtartrabahuanna ngem didak met inawagan. Napanak pay idiay Church Office Building (COB) ngem awan latta. Adu a rason.
Napanak iti awis ni Marilou. Ngem umaw-awis ti gasat, ta nababa ti naidiaya a sueldok ket diak inawat.
Nagsubliak iti West Valley City a nalidem ti panunotko.
Sinubliak ti nagsapul iti trabaho.
Napanak iti Remedy Job Agency a nangala iti eksamen.
Napanak iti Murray Library, ngem natnagak iti interview.
Napanak iti University of Utah Library. Tinagibabak ti $7 per ora a pangrugian a sueldo. Sapsapulek ti $10—nalibtawak: tapno napigpigsa ti petisionko, nangisagana daydi Atty. Golan iti employment offer a $10 per ora ti pangrugian a sueldo, nga insapitna kadagidi dokumento ti aplikasionko. Parupa la daydi, ngem ammok a tinungpalna koma no inriingko; ti imasna, naitalimudok a talaga ti isipko iti Salt Lake, Utah. Isu a diak inawat ti indiaya ti U of U Library, a nagbabbabawiak—no inawatko, napintas koma nga stepping stone iti idudur-asko. Diak met ngamin ammo idi a ti U of U ti kalatakan nga unibersidad iti Utah; a kabimbinnalubalna ti Brigham Young University (BYU).
Malagipko laeng ditoy, a maysa ni Brother Delfin kadagidi di nakalipat a nakisinsinnurat kaniak.
Kitaem daytoy suratko ken ni Sinamar idi Oktubre 31, 1996.
Tallo a suratmon sa daytoy subalitak—maysa ti imbusonmo, ken dua ti impaw-itmo ken ni Bro. Ball, a nakaisapitan ti surat ni Dondon. Adda pay dagiti dadduma a surat a diak pay nasubalitan, kas iti sirat ni Bro., Delfin, ken ti surat ni Manny Naagas a naawatko pay la idi addaak idiay Upland. Ti kasasaadko ditoy? Nasayaat unay da Bart ken Venetta. No mabalin, didak kayat a paggastuen iti para iti kanek, ken pati payen ti bus pass-ko, nga isu ti ipakitam no agluganka iti Utah Bus tapno saankan nga agplete. $27 ti makabulan, ngem mausarmo uray sadino ti papanam a rota ti bus. Inyalaandak idi sangsangpetko, sa manen itay para iti Nobiembre. Kunada, tapno isu kano pay a maurnongko, no kas pagarigan. Isuda pay ti makumikom nga agsapul iti nalaka nga apartment wenno balay a sangpetanyonto. Dina kayat a sawen a papanawendakon, ta agyanak kano agingga a sumangpetkayo. Inyumanda payen iti Bishop ken kadagiti dadduma a miembro ti Hunter 10th Ward ti maipanggep iti parikutko a kuarta a masapulyo. Isuda kanon ti agremedio. Dengdenggen da Bart ken Venetta idi agsarsaritata; ni Bart ti nakaawat iti awagmo. Imbagada a diak aw-awagan da Marilou, wenno asino pay, ta isuda ti makaammo a mangrisut iti parikut. Mabalin nga inton Domingo, addanton maurnongda para iti pauna iti kasapulanyo iti tiketyo. Sakbay a malipatak, damagem idiay Rajah Travel Agency no mabalin a bayadan ti tiketyo ditoy imbes nga ipaw-itko dita Filipinas...
Awan serrekko iti daydi nga aldaw ti Huebes ket intuloyko ti nagsapul iti sabali a trabaho.
Nakisarita ni Bart iti Bishopric ti Hunter 10th Ward tapno tulongandak nga agsapul iti trabaho. Gapu ta awan pay ti trabahok, adda dagidi nangted iti kuarta, kas iti maysa a Sister Peterson, ken dadduma pay. Nangted met daydi Bishop Breinholt iti $100.
