Impasingked ti Malakanyang a tulongan ti gobierno dagiti 20 a Filipino a naarestar ken naibalud iti Qatar idi napan a lawas, kas panangisiguradona iti publiko a saan a baybay-an ti administrasion ni Presidente Ferdinand Marcos Jr. ti asino man a Filipino nga agkasapulan iti tulong iti ballasiw-taaw.
Daytoy ti kinuna ni Communications Undersecretary Claire Castro kalpasan ti report ti Philippine Embassy iti Qatar a naarestar ti sumagmamano a Filipino gapu iti mapapati a panangangayda iti saan nga autorisado a politikal a demonstrasion idi Marso 28 a maipagarup a mainaig iti panangsuportarda ken ni dati a presidente Rodrigo Duterte.
Segun iti Department of Foreign Affairs (DFA), 19 kadagiti 20 a naarestar ti sibabalud wenno adda pay laeng iti kustodia ti polis idi Domingo, Marso 30.
Iti press briefing ita a Lunes, Marso 31, kinuna ni Castro a nagresponde a dagus ti gobierno idi maipadamag ti pannakaarestar dagiti Filipino.
"Dagus a nagtignay ti embahadatayo. Nangibaonkami ti labor attaché ken abogado tapno maammuan ken mairupir dagiti karbenganda," kinunana.
Petision ni Manases Carpio kontra iti kaso nga impeachment ni VP Duterte, inlaksid ti korte
"Malaksid iti dayta, ania man a tulong a maipaaytayo, kas kadagiti care package, agingga a kabaelan ti gobierno, ipaaytayo kadagiti padatayo a Filipino iti dayta a pagilian," innayonna.
Segun iti Palace Press Officer, saan nga ipalubos ti gobierno a mabaybay-an ti asino man a Filipino nga agsagaba iti pannakaibalud iti ballasiw-taaw uray pay no kritikoda iti administrasion.
"Obligasion pay laeng ti gobiernotayo, ti administrasiontayo, a tumulong kadagiti Filipino, ania man ti kapanunotanda," kinunana.
"Awan ti pilpilientayo, awan ti diskriminasion no maipapan iti dayta a banag. Basta Filipinoda, tulongan ida daytoy nga administrasion," impasingked ni Castro. (Argyll Cyrus Geducos/MANILA BULLETIN)
