Sisasagana ti Armed Forces of the Philippines (AFP) a mangtulong iti tallo a Filipino a nabalud iti China gapu iti maipagarup a panagespiada.
Kinuna ti pannakangiwat ti AFP a ni Col. Francel Margareth Padilla, a dida pay naawat ti opisial a report manipud iti Department of Foreign Affairs (DFA) wenno iti Department of Migrant Workers (DMW) maipapan iti kasasaad ti tallo a nabalud a Filipino, ngem sisasaganada a tumulong no kasapulan.
Segun ken ni Padilla, patpatalgedan pay laeng ti DFA ti kasasaad ti tallo a Filipino babaen ti diplomatiko a wagas.
Itay Abril 3, kinompirmar ti pannakangiwat ti ministry on foreign affairs ti China a ni Guo Jiakun nga inarestar ti gobierno ti China dagiti tallo a Filipino gapu iti maipagarup a panangespiada iti China.
Balikatan Exercise ti Filipinas, US, marugian ita nga aldaw
Nabigbig dagiti Filipino a da David Servanez, Albert Endencia, ken Nathalie Plizardo.
Segun iti pagiwarnak ti China a Global Times, nabayagen a residente ti China ni Servanez, ket natiliw ken naibalud daytoy gapu ta umas-assibay kadagiti pasilidad ti militar ti China, a nangpataud iti panagatap dagiti autoridad.
Iti sabali a bangir, dati a benepisiario ti Hainan Government Scholarship Program da Endencia ken Plizardo babaen ti tulag idi 2017 a namagbalin iti Palawan ken Hainan a kas "agkabsat a probinsia."
Nagsublida iti Hainan kalpasan a nagturposda para iti programa a pagasmanganda ken ni Servanez.
Segun ken ni Kuo Yu-jen a propesor ti Institute of China and Asia-Pacific Studies in Taiwan iti National Sun Yat-sen University iti Taiwan, ti pannakaarestar dagiti Filipino ti sungbat a pammales ti China iti panangarestar ti Filipinas kadagit Chinese national gapu iti panagespia kadagiti naglabas a bulan.
Iti kallabes, inarestar dagiti kameng ti National Bureau of Investigation (NBI) ken AFP ti 11 a Chinese national a maipagarup nga agsisiim iti Filipinas idi Enero daytoy a tawen. (Martin Sadongdong/Manila Bulletin//Lito Hilidon/Bannawag)
