Saan a pinatgan ti Sandiganbayan ti kiddaw ni dati a commissioner ti Bureau of Customs (BOC) Nicanor E. Faeldon a mangipila iti demurrer to evidence ken mawaswas ti dua a kasona a panagkunniber, gapu iti nakapuy nga ebidensia.
Gapu iti daytoy, naibilin ken ni Faeldon a mangiparang iti ebidensia iti panagtultuloy ti bista.
Ti demurrer to evidence ti ipila ti maysa a naidarum a kayatna a pawaswas ti kaso a kriminal gapu ta nakapsut ti ebidensia nga imparang ti prosekusion iti korte. Masapul nga adda pammalubos ti korte iti panangipila iti demurrer to evidence.
No pinatgan ti korte ti pannakaipila daytoy ket anamonganna, maabsuelto ti naidarum.
<i>Magellan </i>a pelikula ni Lav Diaz, maipabuya iti 2025 Cannes Film Festival
Ni dati a senador Panfilo "Ping" Lacson ti nangidarum ken ni Faeldon iti dua a kaso ti panaglabsing iti Section 3(e) of R.A. No. 3019, wenno ti Anti-Graft and Corrupt Practices Act, gapu iti dua a kargamento ti rinibu a sako ti imported a bagas ken naikonsignar iti Cebu Lite Trading, Inc. (CLTI) idi 2017.
Insurat ni Associate Justice Maryann E. Corpus Mañalac ti walo a panid a pangngeddeng ti Sandiganbayan, nga inanamongan da Associate Justice Zaldy V. Trespeses (daulo ti Fifth Division) ken Associate Justice Lorifel L. Pahimna. (Czarina Nicole Ong Ki/Manila Bulletin/Lito Hilidon/Bannawag)
