Nakaam-amak ti kellaat a panagwaras dagiti scam call iti umuna a paset ti tawen, iti laksid ti pannakaipaulog ti Subscriber Identity Module (SIM) Registration Law ken ti pannakaiparit ti Philippine Offshore Gaming Operators (POGO), kinuna ni Senadora Grace Poe ita nga aldaw, Abril 4.
Daytoy ti nasukimat ni Sen. Poe kalpasan a rimmuar ti report ti Whoscall, maysa nga anti-scam application, a nagkuna nga immadu ti scam call iti Filipinas iti 74.32 a porsiento iti umuna a paset ti tawen no idilig iti napalabas a tawen.
Kinuna ti Gogolook, ti app developer ti Whoscall ken pribado a kompania a kabinnadang ti Cybercrime Investigation and Coordinating Center (CICC) ti gobierno, nga ipakita daytoy ti panagbaliw iti taktika dagiti scammer.
Segun ken ni Poe, nainget ti paglintegan ti SIM Registration Law iti pannakausar iti SIM ken ti legal a pagibasaran iti dusa iti panaglabsing iti daytoy.
Balikatan Exercise ti Filipinas, US, marugian ita nga aldaw
Kinuna ni Poe a masapul a maidarum ken madusa dagiti scammer, ta no awan ti madusa, itultuloy latta dagiti scammer ti illegal nga aramidda.
Gapu iti daytoy, dinagadag ni Poe dagiti maseknan nga ahensia ken telecommunication companies (telco) ken dadduma pay a maseknan nga itultuloyda ti mangpataud iti kabaruanan a solusion a mangsaranget iti panangiskam iti call ken text. (Hannah L. Torregoza/Manila Bulletin//Lito Hilidon/Bannawag)
