Pinalubosan ti gobierno ti Qatar ti temporario a pannakawayawaya ti 17 nga Overseas Filipino Worker (OFW) a naibalud idi napan a lawas gapu iti maipagarup a panagralida (illegal assembly) mainaig iti pannakaarestar ni dati a presidente Rodrigo Duterte iti International Criminal Court (ICC) iti The Netherlands.
Segun ken ni Sekretario ti Department of Migrant Workers (DMW) Hans Leo Cacdac, dua a bunggoy dagiti naibalud ti maruk-atan--umuna dagiti lallaki iti 2:30 iti parbangon, sa dagiti met babbai kalpasan ti dua nga oras.
Kinuna ni Cacdac a mapalubosan dagiti OFW nga agawid kadagiti pagtaenganda iti Qatar, bayat nga agtultuloy ti pannakaimbestigarda.
Bambantayan ti DMW ken Department of Foreign Affairs (DFA) ti kasasaad dagiti OFW sipud pannakaarestarda idi Marso 28.
Balikatan Exercise ti Filipinas, US, marugian ita nga aldaw
Inlawlawag ni Cacdac nga awan pay ti kaso a naipila kadagiti nasao nga OFW ta agim-imbestigar pay laeng ti gobierno ti Qatar.
Nagyaman ni Cacdac kadagiti opisial ti Qatar gapu iti panangipaayda iti temporario a pannakawayawaya kadagiti 17 nga OFW.
Impaganetget ni Cacdac ti imbilin kenkuana ni Presidente Ferdinand Marcos Jr. a bantayanda ti salun-at ken ipaayda ti legal a tulong kadagiti OFW.
Pinalagipan manen ni Cacdac dagiti OFW a raemenda ti paglintegan ti pagilian a yanda tapno maliklikanda ti riribuk.
Mapan a 10,000 agingga iti 50,000 a Qatari riyal ti multa, ken innem a bulan agingga tallo a tawen a pannakaibalud, ti dusa ti makabasol iti illegal assembly. (Aaron Recuenco/Manila Bulletin//Lito Hilidon/Bannawag)
