Impaulog ti Commission on Elections (Comelec) ita nga aldaw, Abril 4, ti show cause order kontra ken ni Christian "Ian" Sia, agngayangay a diputado ti Siudad ti Pasig, tapno ilawlawagna ti biangna mainaig iti insawangna a maibusor kadagiti single mother.
Dinakamat ti Task Force on Safeguarding Against Fear and Exclusion in Elections (SAFE) ti Comelec dagiti insawang ni Sia maipapan kadagiti single mother, bayat ti panagkampania ni Sia idi Abril 3.
Kinuna ni Sia, a maysa nga abogado, kadagiti single mother iti Pasig nga "agregregla pay laeng ken malidliday" nga iti maminsan iti makatawen, umasidegda kenkuana tapno dennaanna ida.
Segun iti task force, mabalin a linabsing ni Sia ti Comelec Resolution No. 11116 weno ti Anti-Discrimination and Fair Campaigning Guidelines for Purposes of the May 2025 National and Local Elections and BARMM Parliamentary Elections.
Balikatan Exercise ti Filipinas, US, marugian ita nga aldaw
Iti Section 3 ti resolusion, kabayatan ti eleksion, ti asino man a tao a direkta wenno saan a direkta a mangar-aramid iti panang-bully a naibatay iti HIV status, coercion, discrimination against women, discrimination against PWDs iti panagusar iti pampubliko a kasilia, gender-based harassment, labeling, public ridicule against PWDs, vilification of PWDs, panaglabsing iti ordinansa a manglapped iti discrimination, ken/wenno panaglabsing iti kalintegan kadagiti relihioso, kultural a lugar ken seremonia kas nailawlawag iti Section 2 ti resolusion ket madusa iti panaglabsing iti eleksion (election offense).
Maitunos daytoy iti Section 13 ti Republic Act (RA) 9006 ken Section 261 (e) ti Omnibus Election Code ken dadduma pay a pagalagadan a mainaig iti eleksion.
Naikkan ni Sia iti tallo nga aldaw tapno agpalawag no apay a di rumbeng a maipila ti petition for disqualification ken kaso nga election offense kontra kenkuana.
Iti sabali a bangir, inlawlawag ni Sia nga angaw laeng ti insawangna tapno maalana ti atension dagiti dimmar-ay iti kampania, ket dimmawat iti dispensar kadagiti single mother a nasairna.
Iti maysa nga interbiu, kinuna ni daulo ti Comelec George Erwin Garcia a di rumbeng a pagang-angawan dagitoy a banag aglalo no adda iti entablado.
Inlawlawag ni Garcia a masapul nga agtignay ti Comelec ta di rumbeng a palabsen dagiti ang-angaw a kas iti daytoy, di la ket ta agtultuloy latta dagiti kandidato a mangrabak iti relihion, PWD, nataengan ken dadduma pay a sektor. (Dhel Nazario/Manila Bulletin//Lito Hilidon/Bannawag)
