Saan a timmabuno dagiti kameng ti gabinete iti maikadua a hearing ti Committee on Foreign Relations ti Senado idi Abril 3, mainaig iti pannakaarestar ni dati a presidente Rodrigo Duterte iti International Criminal Court (ICC).
Maigapu daytoy iti surat ni Executive Secretary Lucas Bersamin idi Marso 31 nga agkunkuna a "siraraem nga agkedked" ti Malakanyang iti awis ti Senado iti hearing ti komite nga idadauluan ni Senadora Imee Marcos, a kabsat ni Presidente Ferdinand Marcos Jr.
Dinakamat ti Malakanyang ti executive privilege ken ti subjudice rule a kas rason iti panagkedkedda iti awis ti komite.
Binabalaw ni Sen. Marcos ti saan nga idadar-ay dagit kameng ti gabinete ket kinunana a di rumbeng nga usarenda ti executive privilege a pagpambar tapno lisianda dagiti saludsod ken liklikanda ti awis ti Senado.
Balikatan Exercise ti Filipinas, US, marugian ita nga aldaw
Dimmar-ay iti hearing dagiti senador a kaaliado ni Duterte a da Senador Alan Peter Cayetano ken Ronald “Bato” Dela Rosa. Nakipartisipar met ni Sen. Christopher “Bong” Go babaen ti video message.
Impalnaad ni Sen. Marcos ti listaan dagiti daulo ti nadumaduma a departamento ken ahensia a kayatna nga ipa-subpoena tapno agparangda iti sumaruno a hearing.
Nagmosion ni Dela Rosa a maikkan iti subpoena dagiti amin nga opisial ti gobierno a karaman iti pannakaarestar ni Duterte, tapno agparangda iti sumaruno a hearing.
Sakbay daytoy, kinuna ni Senate President Francis “Chiz” Escudero nga inyumannan iti legal department ti Senado ti kiddaw ti komite a maipaulog ti subpoena kadagiti opisial ti Philippine Air Force ken iti maysa a prosecutor ti National Prosecution Service ti Department of Justice’s (DOJ)
Segun ken ni Escudero, masapul nga adalenda a naimbag daytoy a banag, ta addan dua a desision ti Korte Suprema a nangpasingked iti kalintegan ti Executive Department a mangdakamat iti executive privilege.
Kalpasan ti hearing, impanamnama ni Escudero a yumanna pay nga umuna iti legal department ti Senado ti ania man a kiddaw ti komite a mang-subpoena kadagiti kameng ti Gabinete.
Kinuna ni Escudero a ti kinaagwaywayas ti Senado, saan a maiparangarang babaen laeng ti pagayatan ti maysa a kameng daytoy, no di ket iti direksion a kayat a turongen ti institusion. (Hannah L. Torregoza/Manila Bulletin//Lito Hilidon/Bannawag)
