Panggep ti Armed Forces of the Philippines (AFP) a gumatang iti nayon a missile system, warship, ken multi-role jet fighter tapno pagtiponenda ti kabaelanda iti air and missile defense.
Daytoy ti impalnaad ni daulo ti AFP General Romeo Brawner Jr. iti Raisina Dialogue, ti multilateral conference nga insayangkat ti India mainaig iti geopolitics ken geoeconomics, a naangay iti New Delhi itay napan a bulan.
Iti maysa a padamag idi Abril 5, kinuna ti AFP a naibatay ti pannakapamoderno ti AFP iti napaut nga estratehia a mangparang-ay iti kabaelan ti militar. Pinagbalin ti AFP ti maikatlo ken maudi a paset ti modernization program-da iti “Re-Horizon 3”, maysa a panagbusbos para iti militar nga agpaut iti 10 a tawen ken aggatad iti ₱2 a trilion.
Impaganetget ti AFP ti kinapateg ti pannakikadua iti India, kas naipakita iti naballigi a pananggatangda iti BrahMos missile system, ti kapardasan a supersonic cruise missile iti lubong.
Balikatan Exercise ti Filipinas, US, marugian ita nga aldaw
Naawat ti Filipinas ti umuna a battery ti BrahMos missile idi Abril ti napan a tawen.
Malaksid iti BrahMos, panggep ti AFP a gumatang iti 20 a kabaruanan nga F-16 a fighter jet manipud iti Estados Unidos nga aggatad iti US$5.58 a bilion.
Ideliber met ti South Korea ti dua a bapor a corvette iti Philippine Navy ita a tawen.
Ti umuna a bapor, a managananto iti BRP Miguel Malvar, ket manamnama a maited ita a bulan. Ti maikadua, a managananto iti BRP Diego Silang, ket maited iti maudi a paset ti tawen. (Martin Sadongdong/Manila Bulletin//Lito Hilidon/Bannawag)
