Iti naan-anay a pannakaipakat ti Expanded Centenarians Act of 2024 (Republic Act No. 11982), dinayaw ni kandidato a senador Camille Villar ti tignay ti administrasion a mangipaay iti naan-anay nga atensionna kadagiti senior citizen.
“Panawenen tapno ipatungpaltayo ti linteg a mangited iti nayon a benepisio kadagiti lolo ken lolatayo, dagiti senior citizen-tayo. Karbenganda ti kasasayaatan,” kinunana, sa innayonna a sursurotenna ti tradision dagiti Filipino a mangitultuloy a mangipapaay iti pannaripato, ayat, ken respeto kadagiti senior citizen.
“Itan ta nadanonda ti naluomen a tawenda, masapul nga ipariknatayo kadakuada no kasano ti panangay-ayattayo kadakuada ken tapno maksayan ti bakbaklayenda a paggastosan iti inawdaw-aldaw a panagbiagda,” kinunana.
Sagudayen ti linteg, maipaayan dagiti senior citizen iti P10,000 cash benefits apaman a madanonda ti 80 a tawenda ken ti kasta met laeng a kantidad tunggal lima a tawen agingga a madanonda ti tawenda a 95. Maipaayandanto iti P100,000 apaman a madanonda ti maika-100 a tawenda.
Inyebkas ni Villar daytoy a panangdayawna iti gobierno kalpasan ti panangidaulo ni Presidente Marcos iti damo a pannakaibunong ti cash gift kadagiti kualipikado a benepisiario ti Expanded Centenarians Act of 2024 (Republic Act No. 11982) iti Heroes Hall iti Palasio ti Malakanyang idi Pebrero 26, 2025.
Pannakakemmeg ni Sen. Dela Rosa, imbilin ti DOJ; PNP, pinagtignay ni DILG Sec. Remulla
Inkari ni Villar, kandidato a senador iti 2025 midterm polls, nga itultuloynanto ti mangitandudo kadagiti linteg a makatulong kadagiti senior citizen.
Sakbayna, impeksana ti suportana iti Expanded Centenarians Act of 2024. Impeksana pay ti suportana iti Rationalization of Disability Pension for Veterans (Republic Act 11958), a nangingato iti binulan a pension dagiti beterano ken benepisiarioda, ken impanamnamana ti agtultuloy a suportana kadagitoy kas pammigbig iti serbisioda iti pagilian.
