Pimmigsa ti kampania ni agngayangay a senador Camille Villar iti rabii ti Mierkoles kalpasan a pormal a sinuportaran ti Team Aguila, ti kadakkelan a koalision iti politika iti Pangasinan, bayat ti proclamation rally a naangay iti Bolinao, Pangasinan.
Da Pangasinan Governor Ramon Juico III, Vice Governor Mark Lambino, Diputadoti First District Arthur Celeste, ken Diputado ti Abono Party-list Bobby Estrella ti nangpasangbay ken ni Villar, ken nangyebkas iti suportada iti panagngayangayna a senador.
"Agyamanak la unay iti panangsuporta ni Gob. Juico, Vice Gov. Lambino, Congressman Celeste, Congressman Estrella, ken iti entero a Team Aguila. Ti panangsuportayo ti mangtignay kaniak a naan-anay nga agtrabaho para kadagiti umili ti Pangasinan," kinuna ni Villar.
Bayat ti panagbitlana, inkari ni Villar ti panangitandudona iti pannakaitultuloy dagiti proyekto iti impraestuktura iti probinsia ken ti panangtulongna iti sektor ti agrikultura. Impaganetgetna a ti panagkumitna iti Pangasinan ti mangipakita iti nabayagen a dedikasion ti inangna a ni Senadora Cynthia Villar, ken ti kabsatna a ni Senador Mark Villar, a nangitandudo iti programa a nagnumaran dagiti mannalon ken dagiti adda iti away.
Balikatan Exercise ti Filipinas, US, marugian ita nga aldaw
"Kankanayon nga addaak iti sibay ti Pangasinan ket siguraduek a maipangpangruna dagiti kasapulanna iti impraestruktura ken agrikultura, kas inaramid ti pamiliak," innayonna.
Paset ti panagparang ni Villar iti Pangasinan ti agtultuloy a panagrikosna iti entero a pagilian tapno makaala iti suporta manipud iti baba sakbay a dumteng ti aldaw ti panagbobotos.
