Pinaltogan ti maysa a kandidato a para konsehal ti ili ti maysa a kapitan ti barangay bayat ti panagkampaniada iti Barangay Nagtupacan, Lagangilang, Abra idi rabii ti Abril 7.
Nabigbig ti biktima a ni Lou Salvador Claro, 57, kapitan ti Barangay Nagtupacan ken maysa a retirado a polis.
Segun iti umuna a panagimbestigar, maipagarup a dinanog ti suspek a ni Manzano Bersalona Agdalpen, 58, residente ti nasao a bario ken kandidato a para konsehal ti ili, ti maysa a lalaki nga agnagan iti Rommel Apolinar bayat ti panagkampania dagiti kakaduana iti partido a Team Asenso.
Impulong ni Apolinar ken ni Claro, a kameng ti kabalubalda iti politika a Team Progreso, ti napasamak kenkuana.
Red tide, naduktalan kadagiti baybay ti Bolinao, Anda
Immasideg ni Claro, a kinadua ni Apolinar, ken ni Agdalpen tapno pagtalnaenna ida ngem dinanog manen ni Agdalpen ni Apolinar, a bimmales metten.
Induron ni Agdalpen ni Claro, inasutna ti paltogna sa pinaltopaltoganna ni Claro. Ngem adda di am-ammo a lalaki a nangpaltog met ken ni Agdalpen manipud iti likudanna.
Naitaray ni Claro iti ospital ti Bangued, Abra ngem naideklarar a natay sadiay. Naipan met ni Agdalpen iti maysa nga ospital, ngem natay met laeng daytoy.
Insayangkaten ti polisia ti follow-up investigation.
Nabegbeg ti probinsia iti agsasaruno nga insidente ti pammapatay a kaaduanna ti pammaltog bayat nga umasideg ti panagbobotos.
Ti Team Progreso ken Team Asenso ket idadauluan dagiti dua nga agrinrinnisiris a politikal a pamilia iti probinsia. (Tristan Lozano/Manila Bulletin//Lito Hilidon/Bannawag)
