Naglusulos idi Abril 7 ni agngayangay a konsehal iti Siudad ti Pasig Shamcey Supsup-Lee manipud iti “Kaya This” party nga idadauluan ni agngayangay a mayor Sarah Discaya, maipuon iti nagdinamag nga insawang ti maysa kadagiti kamengna mainaig kadagiti solo parent.
"Kalpasan ti naannad a panagpanunot ken panangamiris, siraraem nga inkeddengko ti panaglusulosko iti Kaya This," kinuna ni Supsup-Lee.
Segun ken ni Supsup-Lee, nakipagkameng iti “Kaya This” gapu ta kayatna a makipaset iti banag nga adda kaimudinganna, ngem dagiti napasamak iti kallabes ti nakaamirisanna a saanen a maitunos iti kababalinna kas babai ken maysa nga ina ti turongen dagiti kabunggoyna iti "Kaya This."
Adu ti nangbabalaw iti kapartido ni Supsup a ni Christian "Ian" Sia, nga agngayangay a diputado ti Siudad ti Pasig, gapu iti kontrobersial a sinaona mainaig kadagiti solo parent iti maysa a panagkampaniada.
Dimmawat iti dispensar ni Sia, ket inkarina a saanen a maulit daytoy.
Tallo a bagyo iti ruar, uneg ti PAR, bambantayan ti PAGASA
Ngem idi Abril 4, impaulog ti Commission on Elections (Comelec) ti show cause order para ken ni Sia tapno pagpalawagenda no apay a di rumbeng a maipila ti kaso nga election offense wenno ti petition for disqualification a maibusor kenkuana gapu iti insawangna.
Kinuna ni Supsup, a maysa a beauty queen ken architect, nga inaramidna daytoy a pangngeddeng gapu iti panangraemna iti Miss Universe Philippines ken panangtungpal iti annongenna kadagiti babbai a mangibilang kenkuana a pagwadan.
Iti laksid daytoy a pangngeddeng ni Supsup, inyebkasna ti panagyamanna iti gundaway nga impaay ti Kaya This party. (Richielyn Canlas/Manila Bulletin//Lito Hilidon/Bannawag)
