Nasurok a 8,000 a tao ti nagkamang kadagiti pagbakuitan iti Western Visayas (Region 6) ken Central Visayas (Region 7) gapu iti panagbettak manen ti Bulkan Kanlaon ita nga aldaw, Abril 8.
Segun iti Office of Civil Defense (OCD), 8,316 a tao wenno 2,606 a pamilia ti adda kadagiti 22 nga evacuation center, idinto a 11,583 a tao (3,574 a pamilia) ti napan nagkamang iti balay dagiti kakabagian wenno gagayyemda.
Kaaduan kadagiti adda iti evacuation center ti pimmanaw iti balayda idi bimtak ti bulkan iti Disiembre 9, 2024.
Kinuna ni daulo ti Task Force Kanlaon ti OCD Raul Fernandez a namnamaenda nga umadu pay ti bilang dagiti mapan kadagiti temporario a pagdagusan bayat ti agtultuloy a panagbakuit.
Nora Aunor, 71, pimmusay
Ti kaudian a panagbettak ti Kanlaon itay 5:51 ti parbangon ti nangpataud iti panagtudo ti dapo kadagiti 6 a barangay iti Negros Occidental: uppat iti La Carlota City (Barangay Ara-al, Hagumuit, San Miguel, ken Yubo); saggaysa iti La Castellana (Barangay Sag-Ang) ken Bago City, a nangapektar iti nasurok a 48,000 a katao.
Iti agdama, agtalinaed ti Kanlaon iti Alert Level 3 (high level of volcanic unrest), ngem isagsaganan ti OCD ti posible a pannakaingato daytoy iti Alert Level 4.
Iti sabali a bangir, sisasagana dagiti kameng ti 303rd Infantry Brigade, 3rd Infantry Division (3ID) ti Armed Forces of the Philippines (AFP) nga adda iti Camp Gerona iti Murcia, Negros Oriental, a tumulong kadagiti maseknan nga LGU nga agkasapulan iti panagbakuit. (Martin Sadongdong/Manila Bulletin//Lito Hilidon/Bannawag)
