Pinakdaaran ni presidente ti Senado Francis "Chiz" Escudero ni Senadora Imee Marcos a dina koma us-usaren ti Senado a pagpolitika wenno para iti personal a gandatna iti politika, ket kiniddawna nga usaren koma ti senadora ti bukodna a nagan, titulo, ken impluensia kas rangtay iti panagkaykaysa a saan a tapno mamagsisina.
Imbatad daytoy ni Escudero idi Abril 11 kalpasan ti panangyebkas ni Marcos iti pannakaupayna iti saan a panagpirma ni Escudero iti contempt order kontra ken ni Special Envoy on Transnational Crimes Ambassador Markus Lacanilao kabayatan ti hearing nga inangay ti Senate Committee on Foreign Relations, a mangim-imbestigar iti panangarestar ti ICC ken ni dati a presidente Rodrigo Duterte.
Segun ken ni Escudero, ammo amin a kameng ti Senado nga iti Rules of the Senate, ti bileg ti daulo ti komite a mangibilin iti pannakaarestar wenno pannakaipupok ti asino man a resource person a na-cite in contempt, ket masapul nga aprobaran ti Senate President.
Kinuna ni Escudero nga inlaksid ni Marcos ti nabayagen a pagalagadan ti Senado a saan nga automatiko wenno ministerial ti pananganamong ti Senate President gapu laeng ta isu ti kayatna (Marcos).
Ombudsman Remulla, paspasungbaten ti Korte Suprema iti petision ni Zaldy Co
Inlawlawag ni Escudero a saan a nagkedked a mangpirma iti contempt order ni Lacanilao, ngem nangiruar ni Marcos iti statement ken imparangna iti media ti detention order a pinirmaannan (Marcos) nupay di pay nakita ni Escudero.
Segun ken ni Escudero, naibilin a maipupok ni Lacanilao nga awan iti pannakaaprobarna ken saan a nagdalan iti due process, kas impagunamgunam pay ni Chief Justice ti Korte Suprema Alexander Gesmundo a masapul a maipakat ti nainget a due process iti asino man a maakusaran nga agul-ulbod iti Kongreso.
Ket kas panangtungpal iti due process, nangipaulog ni Escudero iti show cause order para ken ni Ambassador Lacanilao tapno ilawlawagna ti biangna iti las-ud ti lima nga aldaw.
Kinuna ni Escudero a dina ipalubos a mausar ti Senado wenno ti Office of the Senate President para iti politikal a panggep nangruna kadagiti agngayangay manen a senador.
Innayon ni Escudero a ti Senado ket maysa nga institusion ti rason ken turay, ket saan nga alikamen a mausar para iti propaganda wenno panangitandudo iti bukod a bagi. (Dhel Nazario/Manila Bulletin//Lito Hilidon/Bannawag)
