AGMULAKA iti ruot tapno dimon problemaen ti pagpakanmo kadagiti tarakenmo a dingo a kas iti kalding, baka, wenno karnero.

Ngem saan ketdi a basta ruot ti imulam. Dagitay koma napabaro a klase ti ruot. Forages ti awag kadagitoy.

Mairaman kadagitoy a ruot ti napier. No napier ti imula, imula ti ungkay dagiti nasalun-at, natangkenan, ken addaan iti 2 agingga’t 3 a bulanna a napier. Putden ti kada tallo a linawasna sa pairig nga imula dagitoy iti kaaddayo a 50 a sentimetro tunggal binatog ken 50 a sentimetro kada gurit. Siguraduen nga imula ti akimbaba a bukona sa gaburan iti daga tapno nasayaat ti panagramut ken panagsaringitna.

Ni Janet Gracela ti Currimao, Ilocos Norte, ken dagiti mulana a napier. Immulana dagitoy idi Setiembre, ita addan pagal-alaanna iti pagpakanna kadagiti tarakenna a kalding. Saanen a mapan mangruruot.

Adda met dagitay mabalin a mismo a ti puonna ti imula. Maibilang ditoy dagiti ruot a guinea, setaria, ken signal. Pilien dagiti nasalun-at ken di unay a natangkenan a pinuon ti mula. Ikkaten dagiti bulong 6 agingga’t 8 a pulgada manipud iti ramut sa imula dagitoy iti kaaddayo a 25 x 25 a sentimetro ken iti kauneg a 7 agingga’t 8 a sentimetro. Mabalin met nga imula dagitoy kadagiti gurit sa gaburan iti daga. No panagtutudo, agaramid iti pagpatubuan nga aray sa ditoy nga itukit dagiti mula.

Kolum

APO ABOGADO (23): Nakainum ti Nangdungpar iti Luganna

Mabalin met ti agpatubo kadagiti bukel. Agusar kadagiti nasalun-at a bukel. Maibalakad nga ikiwar nga umuna dagiti bukel iti inoculant tapno napimpintas ti panagramut dagitoy. Padasen ti kabaelan ti bukel nga agtubo (seed test) sakbay nga ibunubon tapno masigurado nga adu met laeng ti agtubo kadagitoy.

Ipakpakita ni Dr. Sean Vidad ti mula a setaria kadagiti nagatendar iti panagsanay iti panagmula kadagiti ruot a pagpakan kadagiti dingo.

No dika pay nagmula, mabalinmon a rugian tapno dimonton problema ti pagpakanmo.  Mabalin a matulongannaka ti ekspertotayo iti animal nutrition ken feeding management a ni Dr. Sean R. Vidad, faculty member ti Department of Agricultural Sciences (DAS) iti College of Agriculture, Food, and Sustainable Development (CAFSD).  Malaksid iti dayta, addada pay dagiti kakaduana iti nasao a departamento a mabalin a makatulong kadakayo.  Kadagiti asideg iti MMSU, mabalinyo ti agturong iti MMSU-CAFSD.–O

Iggem dagiti nagsanay dagiti naibunong kadakuada nga imulada a ruot tapno paaduenda.