Mairaman a mayalnag ti Para Kiangan: Antolohia Dagiti Sarita ken Daniw ni Juan Ben Quimba, tubo ti Nueva Vizcaya, bayat ti Dap-ayan 2025: Nailian a Kombension Dagiti Mannurat nga Ilokano nga angayen ti GUMIL Filipinas iti Sta. Teresita, Cagayan inton Abril 26-27, 2025.
Buklen ti libro dagiti napili a sarita ken daniw ni Apo Quimba a kaaduanna ti rimmuar iti Bannawag bayat ti panagpaayna a kameng ti nasao a magasin. Nagpaay ni Apo Quimba, tubo ti Nueva Vizcaya, a kameng ti Bannawag, kalpasan ti Maika-2 a Sangalubongan a Gubat agingga a nagbalin a Managing Editor ti nasao a magasin ken agingga iti panaglusulosna tapno agpaay a Technical Assistant ti Board of Directors ti Philippine Homesite (nagbalin idi agangay a People’s Homesite and Housing Corporation, nga itan, National Housing Authority).
Mismo a ti anakna, ni Dr. Olympia P. Quimba-Malanyaon, ti nangurnong kadagitoy a sinurat manipud kadagiti kopia ti Bannawag a naidulin iti National Library iti Manila.
Mairaman iti libro dagiti nalatak a sarita ni Apo Quimba a ti ”Para Kiangan,” ”Sabong ti Bagbag,” ken ti ”Katawa ti Kabalio.”
Urijah Publishing Enterprises, yalnagna ti libro ni Juan Ben Quimba iti Dap-ayan 2025 ti GUMIL Filipinas
Naaramat met a kas introduksion ti libro ti ”Juan Ben Quimba: Batonlagip ti Bascaran,” interbiu iti autor da Rambaud, Herman G. Tabin, Martin T. Rochina, ken Arnold Pascual Jose nga immuna a naipablaak iti dati a Rimat magasin.
Agpuskol ti libro iti 360 a panid iti rukod a 6” x 9” ken inedit ni Cles B. Rambaud, Editor ti Bannawag, iti panangipablaak ti Urijah Publishing Enterprises. Nagpaay met ni Juan Al. Asuncion, Managing Editor ti Bannawag, a book ken cover designer. Ni met Charmaine A. Lingdas, dati nga staff ni Dr. Malanyaon iti Philippine General Hospital, ti akindibuho iti naaramat a ladawan iti akkub.
