Mayalnag ti maikadua a libro ti AMMA Foundation Literary Awards, ti Dagiti Premiado a Sarita (2015-2024), bayat ti Dap-ayan 2025: Nailian a Kombension Dagiti Mannurat nga Ilokano nga angayen ti GUMIL Filipinas iti ili ti Sta. Teresita, Cagayan inton Abril 26-27, 2025.
Daytoy a libro, a maudi iti dua a libro ti AMMAFLA, ti nakatiponan dagiti nangabak a sarita iti pasalip ti AMMAFLA manipud idi 2015 agingga iti 2024. Ti met immuna a libro ti nakatiponan dagiti nangabak a sarita manipud idi 1997 agingga idi 2014.
Nairaman iti daytoy maikadua a libro, nga agpuskol iti 284 a panid, dagiti sarita a pinangabak dagitoy a mannurat: Edmundo A. Bisquera, Remedios S. Tabelisma-Aguillon, Dexter M. Fabito, Mark Anthony Ganotice, Rhea Rose D. Berroy, Marcelino Francisco D. Santos, Julisa D. Tarape, Leonila Callitong Aday, Mario S. Ascueta, Marichel E. Suguitan, Sonny A. Vila, Rolando D. Tubera, Quezon E. Javier, Rey Joel B. Guerrero, Roselyn C. Campano, Leah Gaborno-Tabieros, Roberto B. Palope, Riaflor B. Rebolledo, Jefferson M. Somera, Derick A. Tong-alan, Franklin D. Gorospe, Ma. Lourdes L. Opinaldo, ken Arnel M. Asis.
Nairuar iti imprenta daytoy a libro iti panagtitinnulong da Amado I. Yoro, Francis T. Ponce, Jocelyn Agustin, Victor ken Maggie Marquez ken pamiliada, ken Mario Orbito.
Mangngabel ken dumadait ti Ilocos Norte, pinadayawanda ti bandera ti Filipinas bayat ti Palarong Pambansa
Da met laeng Amado I. Yoro ken Francis T. Ponce, iti pannakitinnulong ni Fred A. Quibol, ken dagiti kaingungotda, ti mangimaton iti AMMA Foundation Literary Awards.
Kas iti immuna a libro, nagpaay nga editor da Cles B. Rambaud ken Juan Al. Asuncion, agpada a kameng ti Bannawag. Ti met GUMIL Filipinas ti publisher. (Lito P. Hilidon)
