NASANGA ken nabunga. Natubbog dagiti bungana. Kaay-ayo dagiti aggatang.
Isu daytoy ti MMSU off-season a kamatis.
Mismo a dagiti nakapadas a nagmula iti MMSU-off season a kamatis manipud iti Vintar, Burgos, Sarrat, Pinili, ken Pasuquin, Ilocos Norte ti nakaistoria iti daytoy.
Pudno a narigat ti agpatanor iti off-season a kamatis ta kalabanmo ti saan a nasayaat a tiempo kangrunaanna ti bagyo. Numona ta tallo a bagyo ti nangdalapus kadagiti mula ita a tawen. Ngem babaen ti panangsurot iti umno a teknolohia a kas iti panagaramat iti trellis (pagkalatkatan), panagaramat iti alep-ep, ken panangtaripato a nasayaat kadagiti mula, nagballigi dagiti nagmula iti off-season a kamatis.
APO ABOGADO (24): Mabalinko Kadi ti Mangasawa Manen No Indiborsionak ti Foreigner nga Asawak?
Siempre, no adda dumteng a bagyo, sayaaten nga igalut dagiti mula kadagiti pagkalatkatan wenno saduko, masapul met a natibker ti ipanmo a pagkalatkatan tapno saan nga iwirawir ti angin.
Tapno malapdan ti panagtubo dagiti ruot, agaramat met ti alep-ep. Mabalin ti garami wenno plastic mulch.
Iti panagaramat iti trellis, mabalin nga umun-una nga agikabil dagitoy tapno dagus nga isu ti suroten dagiti mula bayat ti panagdakkelda. Babaen pay ti trellis, saan a maidekket dagiti bunga ti kamatis iti daga a gapu ti pakalungsotanda.
Gapu iti napintas a presio ti kamatis iti agdama, maay-ayo manen nga agmula dagitoy nangipadas iti off-season a kamatis. Ngem uray nababbaba ti presio, basta adda sigurado nga aggatang, napintas unay, kunada.
Iti Ilocos Norte, daytoy programa iti panagmula ti MMSU-off-season a kamatis ket pagbimbinnuligan nga ipatpatungpal ti MMSU babaen ti Research ken Extension Directorates, Provincial Government of Ilocos Norte babaen ti Office of the Provincial Agriculturist-HVCC, ken dagiti sumagmamano a lokal a gobierno ti probinsia.
Para iti teknolohia ti panagmula iti off-season a kamatis, makiuman kada Jilves Jimenez ken Jonathan Ramos, agpada nga agserserbi iti MMSU Research Directorate.–O
