Apagisu la unay iti tiempo ti kalgaw, naluktan ti Ilocos Sur Adventure Zone iti Banaoang, Bantay, Ilocos Sur idi Abril 15, 2025. Agduduma nga adventure ti idiaya daytoy kadagiti umili ken turista a mayat a mangpadas iti roller coaster zipline, wall climbing, ken agduduma a rope courses, babaen ti panangtarawidwid ti Provincial Tourism Development and Promotion Office. Malaksid kadagiti aktibidad, mabsog pay dagiti matam ken sigurado a maalaam pay iti napipintas a ladawan dagiti berde a kabambantayan iti daya a nagbedngan ti probinsia ti Abra ken Ilocos Sur, kasta metten ti Karayan Abra, ti kadakkelan a karayan iti probinsia ken mapapati a nakakitaan ti maysa a baket iti maladaga a bulsek ken napanaganan kalpasanna iti Pedro Bukaneg, ti nangsurat iti epiko a “Biag ni Lam-ang” ken mabigbig nga Ama ti Literatura nga Ilokano. Nagtitipon ngarud nga adventure, nakaparsuaan, ken pakasaritaan ti idiaya ti Ilocos Sur Adventure Zone isu a yawis ita ti Ilocos Sur: Umaykayon pumasiar! (Ladawan: Opisina ti Gobernador ti Ilocos Sur/Teksto: Mancielito S. Tacadena)
