Masapul a nasayaat ti sueldo dagiti mangmangged iti probinsia a kas iti matgedan iti Metro Manila.
Daytoy ti ingganetget ti Trabaho Party-list itay Abril 22, kas sungbat iti kanayon a parikut a trapiko iti Kamanilaan.
Nabukel daytoy a kapanunotan kalpasan ti paliiwda iti kallabes a Kuaresma, a naksayan ti kaadu dagiti lugan iti National Capital Region (NCR), a nangep-ep iti parikut iti trapiko dagiti agindeg iti siudad.
Segun ken ni Mitchell-David Espiritu, pannakangiwat ti Trabaho Party-list, napateg ti pannaka-decentralize para iti ad-adu a gundaway iti nasayaat a trabaho iti pannakarisut ti kinaadu unay ti lugan iti siudad.
Patien ni Espiritu a babaen ti panangbukel iti ad-adu a panggedan ken nangatngato a sueldo kadagiti probinsia, makissayan dagiti agsapul iti panggedan iti Metro Manila, ket makissayan met dagiti komiuter nga aglugan iti inaldaw iti siudad.
Malakanyang, saanna nga us-usaren ti ICC kontra kadagiti Duterte
Maysa ti Metro Manila kadagiti most congested metropolis iti sangalubongan, ket mapan a 127 nga oras (katukad ti 5 nga aldaw) ti busbosen dagiti motorista a mailakon iti trapik iti las-ud ti makatawen.
Segun iti maysa a panagsukisok idi 2024, mapan laeng a 13 a kilometro tunggal oras (kph) ti average speed dagiti lugan no kasta a rush hour.
Itantandudo ti party-list ti panagpuonan ti gobierno kadagiti industria kadagiti rehion, panangpasayaat iti impraestruktura, ken insentibo dagiti negosio a mangipatakder iti operasionda iti ruar ti NCR.
Daytoy a singasing ti Trabaho Party-list ti mangipapakita iti kinapateg ti panangtaming iti makaigapu iti nailet a siudad babaen ti pannakaiwaras ti trabaho kadagiti probinsia. (Ellson Quismorio/Manila Bulletin//Lito Hilidon/Bannawag)
