“WOW, El Nido!” Agsasagadsad dayta a balikas idi pudno a nadanonmin ti agdindinamag nga El Nido idiay probinsia ti Palawan.
Kasla naipatakderda laeng a kastilio ken dadakkel a katedral!
Agingga ita, kasla tagtagainep pay laeng kaniak ti pannakaadakko iti dayta nga Isla. Nakapimpintas a talaga ti Filipinas. Dagiti la unay limestone wenno nangangato a natitirad a bato a kunam la’ng a maysa a nadaeg a pagdaydayawan. Aglulumba dagitoy iti katayag. Nararampayok a kasla alun-onenna ti rikna. Ngem nakangayngayed.
Apay pagdidinnamagan laengen daytoy nga Isla? Ania ti makita sadiay?
Manipud Kadagiti Agdama a Kameng ti Bannawag: Dios ti Agngina!
Apagsungadmi pay laeng iti wangawan ti El Nido kasla laeng dagiti posters a makitkitak.
“Pudno kadi ti makitkitak?” nakunak iti bagik.
Napino ti kadaratan iti babaet dagiti nagtatayagen a pasdek. Arigna addaka iti ballasiw-taaw kas mabuybuya iti telebision ken YouTube.
di dumanonkamin iti igid ti baybay, nakapurpuraw a napino a kadaratan. Simmabet ti nalamiis a pul-oy ken dagiti kasla kastilio a nagngangato a batbato iti taaw. Papintasen daytoy dagiti dekolores a motorboat a naisaad iti sakaananna.
Simmalpakamin iti motorboat nga inupaanmi. Dosekami amin a nagkukuyog.
Idi agrubuaten ti motorboat, masdaawka iti kinalit-aw ti danum. Kasla kristal. Nakadaldalus. Makita dagiti maipattopattok nga isla a nagsinan-palasio. Natitirad ti murdong dagitoy. Ti nakaay-ayo, makitam dagiti aglulumba nga ikan iti danum.
Immuna a binisitami ti makunkuna nga Isla ti Seven Commandos. Nakapurpuraw ken nakapimpino a kadaratan. Mabalin ti agay-ayam iti volleyball. Pinanaganda daytoy iti Seven Commandos ta ditoy a naisadsad ti pito a soldado idi Maikadua a Gubat iti Sangalubongan.
Kalpasan ti duapulo a minuto, impandakami manen iti Big Lagoon. Mabalin sadiay ti agum-uma nga agdigos a kaduam dagiti nakapuspuskol nga aglalangoy nga ikan. Nakalitlit-aw ti danum.
Inserrekdakami met iti Secret Lagoon. Maysa daytoy a pagdidigosan iti baet dagiti natatayag a limestone. Agpipila dagiti sumrek iti umanay laeng a bagi a pagusokan. Pudno, kasla maysa a swimming pool iti uneg. Tumangadka, kasla addaka iti uneg ti kastilio.
Binisitami met ti Shimizu Island. Sadiay metten a nangaldawkami. Nagdidigos ti inobrami. Naginana. Mabalin ti agidda iti nakapimpino a darat a sabsabuagan iti nakalitlit-aw a danum. Kunak, kasla iti pelikula laeng a mabuybuyak daytoy.
Dimmagaskami pay iti Small Lagoon a kayaking area. Dua gasut ti pagbayad. Ditoy a makitam dagiti adu nga ag-kayaking.
Adu pay dagiti mabisita ngem dayta laeng a parte ti innalami a “tour package.” Piman, agkurang ti kuartami!
Kasano a nakapankami sadiay?
Manipud iti NAIA Terminal 3 iti Metro Manila, nasurok a maysa nga oras ti biahe agingga iti eropuerto ti Palawan. Apagdissaagmi sadiay, addan dagiti nakasarsaritami no kayatmi ti agpasiar iti puseg ti siudad. Iti Butterfly garden. Iti Palawan Underground River. Wenno island hopping iti El Nido! Kaskam la nakangngeg a tuleng.
“Iti El Nido!” arigna naggigiddankami a nangibaga. A kunam laeng no nalaka laeng ti mapan sadiay.
Idi addakamin iti Puerto Princesa a kabesera ti Palawan, nag-book a dagus ti maysa a kaduami. Kinasaritana ti ahente a mangitunda kadakami idiay El Nido. Balor PhP2,200 ti bayad ti maysa a tao a mapan sadiay nga isla. Adda metten sadiay ti pangngaldaw. Ken van a pagluganan.
Nagrubuatkami iti alas tres iti parbangon manipud iti Puerto Princesa. Adda pay danagmi idi ta intudona met iti rabii. Delikado ti mapan idiay nga isla no matutudo. Isu a kapintasan iti panawen ti kalgaw nga ibibisita sadiay.
Innem nga oras a tarayen ti van a mapan idiay Isla ti El Nido. Nalawa ti sementado a dalan. Nalamiis ti angin ta kabambantayan ti lasaten. Igid pay ti baybay. Nagtatayag a bantay a panagkunak, birhen pay dagitoy. Nakalanglangto dagiti kayo. Kunak, “paraiso” daytoy nga Isla. Kadagiti nalasatanmi, manmano laeng dagiti balbalay. Maipattopattok. Ken ordinario laeng a naaramid iti nipa wenno bahay kubo.
Napaspas ti van a naglugananmi uray naminduakami a nagsardeng para iti panagkape.
Pasado alas otso iti bigat idi dumanonkami sadiay. Adda metten nangsabat a kadakami a kontak met laeng ti “travel and tours” manipud iti Puerto Princesa.
Segun iti tour guide-mi, naipanagan ti El Nido ta adu ti maala ditoy nga itlog ti balinsasayaw.
Ala, padasem met ti mapan agpasiar sadiay. Maikkat la ketdi amin a bambannogmo. Para kadakami, adda latta iti lagipmi ti ngayed ken pintas ti El Nido. Ti nakaparsuaan. Ti naindaklan nga aramid ti Apo. --O
