Naipaay ken ni Senatorial aspirant Camille Villar ti dakkel a show of support idiay Zambales idi Lunes, iti panangipeksa ni Gobernador Hermogenes Ebdane Jr. ken dagiti kakaduana a lokal nga opisial ti naan-anay a suportada iti kaubingan a kandidato iti 2025 Senate race.
Bimmisita ni Villar, 40, kadagiti ili ti Castillejos, Iba, ken Olongapo kas paset ti provincial campaign swing-na, a nakiumananna kadagiti nadumaduma a sektor a pakairamanan dagiti senior citizen, youth groups, ken civic organizations.
“Ti panagkadua ti gobierno nasional ken lokal ti tulbek ti panagrang-ay,” kinuna ni Villar kadagiti umili, ken nangipaganetgetanna iti panagkumitna iti kita ti panagserbi a mangtaming kadagiti espesipiko a kasapulan dagiti komunidad iti ruar ti Metro Manila.
Dinayaw ni Ebdane ti track record ni Villar iti serbisio publiko ken ti nabayagen a suporta ti pamilia ni Villar iti Zambales, nangruna iti impraestruktura ken agrikultura. Indagadagna kadagiti kaprobinsiaanna ti nainsiriban a panagbotosda iti masungad nga eleksion.
“Marami tayong naririnig na pangalan, pero isa lang ang kandidata natin dito — si Camille Villar,” kinuna ni Ebdane bayat ti panagkampaniana kaduana ni Villar.
Petision ni Manases Carpio kontra iti kaso nga impeachment ni VP Duterte, inlaksid ti korte
“‘Pag totoo ang serbisyo, kahit pagod ka na, nawawala ang pagod,” innayonna, a nakagun-od iti palakpak manipud iti tallaong.
Nairaman a nangpasangbay ken ni Villar da Mayor Jeff Khonghun, Vice Mayor Christian Esposo, ken dadduma pay a lokal a lider a nangipeksa met iti panangsarurongda iti panangyendorso ti gobernador ken ni Villar.
Idiay Iba, indauluan ni Villar ti maysa nga aktibidad iti babaen ti “RICEUP” initiative a nangitandudo iti agribusiness training a kas ramit a mangitag-ay iti panagbiag dagiti mannalon ken mangngalap. Intampokna ti potensial dagiti kakasta a programa a mangnayon iti matgedan ken iti pannakapaadda ti umdas a taraon, a maitunos iti panangitandudona iti “sipag at tiyaga” a kas dalan nga agturong iti balligi.
Iti Siudad ti Olongapo, nakipagkita met ni Villar kadagiti senior citizen iti maysa a pasken iti SMX Olongapo nga indauluan ni Mayor Rolen Paulino Jr. a nangikarianna nga itandudona dagiti polisia a mangsaluad iti pagimbagan ken karbengan dagiti nataengan.
Bayat nga umas-asideg ti eleksion, ti ibibisita ni Villar iti Zambales ti nangpatibker iti support base-na ken nangpatibker iti ladawanna a kas dinamiko, result-driven a lider a mangipampamaysa iti irarang-ay koma ti amin.
