Impakaammo ti Department of Education (DepEd) idi Abril 22 nga isagsaganadan ti suporta para iti rinibu a mannursuro ken education personnel nga agserbi iti May 2025 National and Local Elections.
Impaganetget ni Sekretario ti DepEd Sonny Angara ti panagkumit ti ahensia a mangsalaknib ken mangpabileg kadagiti mannursuro, ket bigbigenna ti napateg nga akem dagiti mannursuro a kas kangrunaan a mangbantay iti demokrasia.
Nairaman ti DepEd iti panagpirma iti memorandum of agreement (MOA) ti Commission on Elections (COMELEC), ti Armed Forces of the Philippines (AFP), ti Philippine National Police (PNP), ken dadduma pay a maseknan nga ahensia.
Kangrunaan a nailanad iti MOA ti legal ken medikal a tulong a maipaay kadagiti mannursuro a napusgan nga agserbi iti eleksion; mapatibker a koordinasion ti DepEd, COMELEC, ken ti polisia; agraman ti alagaden ti political neutrality tapno maliklikan ti partisano nga aktibidad.
Saanmi a pangpangtaan ti asino man --Malakanyang
Nagkari met ti Integrated Bar of the Philippines (IBP) a mangipaay iti legal a tulong kadagiti mannursuro a mabalin a maidarum bayat ti panangipatungpalda iti akemda iti eleksion.
Paggunayen ti DepEd ti Election Task Force (ETF) kadagiti Central, Regional, ken Schools Division Offices, nga agpaay a kas rapid-response unit, nga agbantay ken mangipakaammo kadagit aktual a mapaspasamak.
Umawat dagiti agpaay nga ETF iti honoraria, overtime pay, wenno compensatory time off (CTO), kas maitunos iti paglintegan ti gobierno ken iti employment status-da. (Merlina Hernando-Malipot/Manila Bulletin//Lito Hilidon/Bannawag)
