Simmina ket insiwet nga immadayo ni Joo Dae Yeong, Koreano a kameng ti Gapyeong Cycling Team, iti kalinlinnumbana a Filipino a ni Jan Paul Morales ti Standard Insurance, iti maudi a 30 a kilometro tapno maiturayanna ti 190.7 a kilometro nga Stage 1 ti 2025 Tour of Luzon a nangrugi ken nagngudo iti Siudad ti Batac, Ilocos Norte idi Huebes, Abril 24.
Nagsinsinnublat ti 28-anios a Koreano ken ti Southeast Asian Games medalist a ni Morales iti lead pack sakbay a binukodan ni Joo ti maudi a paset ti lumba idinto a madlaw a kimmapsut ti beterano siklista a Filipino iti kainaran ti nabara a kalgaw.
Binallasiw ni Joo ti finish line a nakatayag dagiti imana babaen ti time-na nga 4 nga oras, 13 a minuto, ken 0.02 a segundo.
“Paset dayta ti plano. Kayatko a bumallasiw iti finish line a sisiak laeng,” kinuna ni Joo, a maikalima idi iti 2019 Ronda Pilipinas.
Saanmi a pangpangtaan ti asino man --Malakanyang
Agpada a napigsa ti panagrubuat da Joo ken Morales ken nasapa a naadaywanda ti grupo dagiti nagdadarison a siklista, ket dandani walo a minuto ti nangunaanda ngem napegpegges ti Koreano ket binukodanna ti tallo nga sprint mini-races ti sibubukel nga stage.
Idi addan iti ili ti Bacarra, naggarawen ni Joo ket saanen a pulos a nagpaatiw ket inyalatna ti red jersey, ti simbolo ti liderato ti overall individual general classification, nga isuotna iti team time trial Stage 2 a mapan iti Siudad ti Vigan ita a Biernes, Abril 25.
Ti umuna kadagiti walo nga stage ti lumba ket nakipartisiparan ti 119 a siklista manipud iti 17 a team ken linasatda dagiti ili ti Vintar, Bangui, Pasuquin sakbay a nagbueltada iti Pagudpud nga agsubli iti Paoay.
Saanen a nakakamat pay ni Morales ta nag-crash ti bisekletana iti maudi a 400 a metro ket nag-time laengen iti 5 a minuto ken 37 a segundo kalpasan ti oras ni Joo.
Nupay kasta, naala ti teammate ni Morales a ni Ronald Oranza ti maikadua a puesto kalpasan a limmas-ud iti finish line iti uppat a minuto ken 22 a segundo kalpasan ni Joo. Maikatlo met ni Aidan James Mendoz ti Go for Gold Team iti orasna nga uppat a minuto ken 27 a segundo.
Mairaman iti Top 10 da Dominic Perez ti Exodus Army Cycling Team, George Oconer ti Standard Insurance, Mervin Corpuz ken Rustom Lim ti MPT Drivehub, Mohammad Faiz Fakhri ken Ahmad Syazrin Awang Ilah ti Malaysia Pro Cyling, ken ti kadua ni Joo a ni Choi Tae Yeon.
Indauluan met ti Standard Insurance ti Stage team classification. (Kristel Satumbaga-Villar/MANILA BULLETIN)
