Naginnarakup dagitoy nga agassawa iti asideg ti lugar ti insidente, maysa nga aldaw kalpasan a pinapatay ti maysa a drayber ti adu a tattao bayat ti piesta ti komunidad dagiti Filipino idi Domingo, Abril 27, 2025, iti Vancouver, British Columbia. (Ladawan ti AP/Lindsey Wasson)

Naipila ti kaso a pammapatay idi Domingo, Abril 27, kontra iti suspek iti panagpadalis a nakatayan ti 11 a tattao nga agtawen iti nagbaetan ti 5 ken 65 iti maysa a Filipino heritage festival iti Vancouver, British Columbia, Canada.

Indarum ti British Columbia Prosecution Service ni Kai-Ji Adam Lo, 30, iti walo a kaso a second degree murder ken mabalin nga ad-adu pay a darum ti mainayon.

Pinulpullo a sabsabali pay ti nasugatan, a dadduma ti adda iti kritikal a kasasaad. Saan pay nga inruar dagiti autoridad ti nagan dagiti biktima.

Maysa a lalaki a nagmaneho iti nangisit nga Audi SUV ti simrek iti kalsada iti agarup alas otso ti rabii idi Abril 27 ket dinungpar ken pinadalisanna dagiti tattao a timmabuno iti Lapu Lapu Day festival. Naasrestar a dagus ti lalaki (ni Lo), a residente met laeng iti Vancouver. Segun kadagiti polis, addaan problema ti salun-at ti isip ti suspek.

Internasional

12 nga estado ti US, indarumda ti administrasion ni Trump tapno isardengna ti annurotenna iti taripa

Iti video kalpasan ti insidente, makita dagiti natay ken nasugatan iti akikid a kalsada iti South Vancouver a napaigidan kadagiti food truck. Makita met ti SUV a narungrungdo ti sangona.

Segun iti maysa a nakasaksi iti pasamak, ni Kris Pangilinan, nakitana ti in-inut nga iseserrek ti SUV a limmabas iti barikada sakbay a binaddekan ti drayber ti gas pedal ti luganna ket dinungparna ti lugar a napno kadagiti tattao kalpasan ti maysa a konsierto.

"Imbaddekna ti gas, dinungparna dagiti bunggoy ti tattao. Ket ti laeng malagipko ket ti pannakakitak kadagiti bagi ti tattao a naipalpallangatok iti angin a nangatngato pay ngem kadagiti food truck sa nagdissoda iti daga, ken dagiti tattao nga agririraw ken agiikkis. Kasla maysa a bola ti bowling a nangdungpar kadagiti bowling pin ken amin a pin ket naipuruakda a naipallangatok.”

Kinuna ni Pangilinan a narigat a patien nga “adda maysa a tao a kagurana unay dagiti Filipino.”

Padpadayawan ti dakkel a populasion dagiti Filipino iti Vancouver ni Lapu Lapu, a maysa a nailian a bannuar ti Filipinas. Addaan ti Vancouver iti nasurok a 38,600 nga umili a Filipino, a 5.9% iti dagup a populasion ti siudad, segun iti Statistics Canada, ti ahensia a mangisaysayangkat iti nasional a sensus. (Assodiated Press)