Adda 17 nga agtarigagay nga agbalin nga Associate Justice ti Korte Suprema a mabakante inton Hunio 4 gapu iti panagretiro ni Associate Justice Mario V. Lopez.
Asino man ti madutokan kadagiti tallo a nominado nga idatag ti Judicial and Bar Council (JBC), isu ti agbalin nga umuna a dutokan ni Presidente Marcos Jr. kas paset ti 15 a kameng ti kangatuan a pangukoman ti pagilian.
Kas maitunos iti paglintegan, ti JBC--ti mangawat, mangtingiting, ken manginominar iti madutokan iti hudikatura--ti nangikeddeng iti maangay a public interview kadagiti agtarigagay.
Siam ti agtarigagay manipud iti Court of Appeals (CA), nga isu da Presiding Justice Fernanda Lampas Peralta ken dagiti Associate Justice a da Nina G. Antonio-Valenzuela, Ramon M. Bato Jr., Carlito B. Calpatura, Ramon A. Cruz, Maria Elisa S. Diy, Myra V. Garcia-Fernandez, Ronaldo Roberto B. Martin, ken Walter S. Ong.
Manipud iti Sandiganbayan, agtarigagay da Associate Justice Karl B. Miranda ken Ronald B. Moreno, idinto a ni Associate Justice Maria Rowena M. San Pedro ti agtarigagay manipud iti Court of Tax Appeals (CTA).
Impeachment trial ni VP Duterte, agtultuloy iti laksid ti petision iti Korte Suprema
Dadduma pay nga agpanggep nga agbalin a kas Associate Justice da University of the Philippines College of Law Dean Darlene Marie B. Berberabe, ti abogado a nagpaay iti Department of Finance a ni Maria Rosario de Leon, ti dekano ti University of Asia and the Pacific Institute of Law a ni Maria Concepcion S. Noche, ti diplomat ken dati nga Undersecretary ti Department of Justice a ni Manuel Antonio J. Teehankee, ken ti SC Court Administrator a ni Raul B. Villanueva.
Isayangkat ti JBC ti interbiu inton Mayo 14 para kada Antonio-Valenzuela, Bato, Berberabe, Bernardo, ken Calpatura; inton Mayo 15 met da Cruz, Diy, Garcia-Fernandez, ken Lampas Peralta.
Sumaruno a mainterbiu da Martin, Miranda, Moreno, ken Noche inton Mayo 16; sa da Ong, San Pedro, Teehankee, ken Villanueva inton Mayo 21. (Rey G. Panaligan/Manila Bulletin//Lito Hilidon/Bannawag)
