Indarum ti Department of Justice (DOJ) ni dati a pannakangiwat ti presidente Harry Roque iti di mapiansaan a kaso a qualified human trafficking iti Angeles City Regional Trial Court (RTC).
Iti statement ni Roque idi Abril 28, kinunana nga ibilangna a panangidadanes ken pananglais iti hustisia ti inaramid ti DOJ.
Naipila ti kaso kalpasan ti panagimbestigar ti maysa a grupo ti prosecutor ti DOJ gapu iti reklamo nga indatag ti Philippine National Police-Criminal Investigation and Detection Group (PNP-CIDG).
Mainaig ti kaso iti mapapati a pannakairaman ni Roque, ken dagiti kakaduana a naidarum, kadagiti aktibidad a maibilang a qualified human trafficking nga ar-aramiden ti Lucky South 99, maysa a POGO (Philippine Offshore Gaming Operator) iti Porac, Pampanga a rinaut ken inserra ti gobierno.
Ombudsman Remulla, paspasungbaten ti Korte Suprema iti petision ni Zaldy Co
Segun ken ni Roque, awan dagiti elemento ti qualified human trafficking iti kasona ta saan met a nagrekrut, nangyallatiw, nangibiahe, wenno nangibalud kadagiti Intsik wenno Filipino a mangmangged para iti inkapilitan a panagtrabaho ken panagbalangkantis.
Dinakamat ni Roque dagiti sinao ni Cassandra Li Ong iti panangbista ti Kamara, a saan nga abogado ti Lucky South 99 ni Roque, ket inlawlawagna a maysa laeng a biddut ti pannakairaman ti naganna iti organizational chart ti Lucky South 99. (Jeffrey Damicog/Manila Bulletin//Lito Hilidon/Bannawag)
