Uppat nga Intsik ti nakemmeg kalpasan nga isukoda ti agarup ₱1.7 a milion a balor ti puslit a sibuyas bayat ti operasion nga insayangkat ti Criminal Investigation and Detection Group (CIDG) iti Mexico, Pampanga idi Abril 26.
Kinuna ni Police Maj. Gen. Nicolas Torre III, direktor ti CIDG, a naiwayat ti operasion gapu kadagiti report a posible a panagipuslit kadagiti produkto nga agrikultura babaen ti maysa a trailer truck a lumabas iti ili ti Mexico.
Napan dagiti kameng ti CIDG iti nasao a lugar ket nakitada ti dua a trak nga addaan karga a 40-pie a container van, iti Barangay Laug.
Idi sinukimat dagiti polis, napaneknekanda ti panagipuslit ta naglaon ti container van iti puraw a sibuyas imbes koma a Japanese chicken strips kas nailanad kadagiti importation document.
Segun ken ni Torre, naggapu iti China dagiti puraw a sibuyas a nasamsam manipud iti trak.
Presidente Marcos, nagpaayab iti special session ti Kongreso inton Hunio 17
Naipan dagiti uppat nga Intsik iti opisina ti CIDG iti Pampanga ket maidarumda iti kaso a panaglabsing iti Section 7 paragraph (c) ken (e) ti RA 12022 (Anti-Agricultural Sabotage Act) mainaig iti RA 10845 (Anti-Agricultural Smuggling Act of 2016) gapu iti panagusarda iti palso nga import ken shipping document, agraman ti kaso a tax evation gapu iti misclassification, misdeclaration wenno undervaluation ti inangkat a produkto. (Aaron Recuenco/Manila Bulletin//Lito Hilidon/Bannawag)
