Impalgak ti Land Transportation Office (LTO) ita a Biernes, Mayo 2, a nangipaulog iti show cause order (SCO) para iti maysa a nalatak a babai a motorcycle vlogger (motovlogger) kalpasan a mapapati a pinagsasawan ken inumsina ti maysa a drayber ti pick-up truck bayat ti nabara a panagririda iti maysa a kalsada iti Zambales.
Kinuna ni LTO Chief ken Assistant Secretary Vigor D. Mendoza II a nakiddaw iti motovlogger a managan iti "Yanna" ken addaan iti 435,000 a follower iti Facebook, nga ilawlawagna no apay a saan a masuspeso wenno ma-revoke ti driver’s license-na gapu ta saan a mainugot a tao nga agmaneho iti motor vehicle.”
“Matagal na tayong nagpapaliwanag sa milyon-milyon nating mga kababayang motorista na walang mabuting idinudulot ang init ng ulo sa kalsada--at napakarami na ang naparusahan natin dito,” kinuna ni Mendoza.
“Iti biang daytoy a vlogger, inusarna koma ti impluensiana iti social media tapno maitandudo ti responsable a panagmaneho ken kinatalged iti kalsada,” innayonna.
Walo iti 10 a biktima iti road crash iti SCTEX, agturong iti religious summer camp
Maibatay iti viral video a sinukisok ti LTO Social Media Team, insenias ni Yanna ti middle finger gesture iti drayber ti pick-up truck ta saan kano nga umisu ti panagmaneho ti nasao a drayber.
Idi agangay, nagsardeng ken bimmaba ti drayber ti pick-up ket dinamagna no apay a kasdi ti inaramid ti motovlogger. Inlawlawagna met a saan a posible ti normal a panagmaneho iti rough road.
Ngem intultuloy ni Yanna ti nakisupiat iti drayber ti pick-up ken pinagsawanna pay ketdi kadagiti makainsulto a komento ti drayber uray idi pimmanawen daytoy.
Immunan nga ingganetget ni Sekretario ti Department of Transportation Vice Dizon a tamingen ti gobierno dagiti di maiparbeng ti aramidna ken iresponsable a driver tapno masigurado ti kinatalged dagiti amin a road user iti baet ti umad-adu a kaso dagiti aksidente ken road rage.
Nagpadispensaren ni Yanna kalpasan a na-bash iti social media. Ngem kinuna ti hepe ti LTO a maituloy latta ti imbestigasion tapno maikkan iti leksion ti lady motovlogger. (Martin Sadongdong/MANILA BULLETIN)
