Impanamnama ni Presidente Ferdinand Marcos Jr. kadagiti mangmangged a Filipino idi Mayo 1, Aldaw Dagiti Mangmangged, a tamingen ti gobierno ti idardariragda a nangatngato a sueldo babaen ti Regional Tripartite Wages and Productivity Boards (RTWPB), tapno maitandudo ti pagsayaatan dagiti mangmangged ken ti panagrang-ay ti ekonomia a pakairanudan ti amin.
Kinuna ni Presidente Marcos nga ad-adalen ti RTWPB ti nibel ti sueldo iti tunggal rehion, idinto a naipatungpalen ti pannakaingato ti sueldo iti 16 a rehion sipud idi Hunio ti napan a tawen.
Segun ken ni Bureau of Local Employment head Assistant Secretary ti (Department of Labor and Employment (DOLE) Patrick P. Patriwirawan Jr., marugian ita a bulan ti pannakarepaso dagiti minimum wage rate iti dadduma a rehion, kas imbilin ti Presidente.
Maipapan iti ₱200 a legislated wage hike, kinuna ni Patriwirawan a sisasagana ti DOLE a mangipatungpal iti daytoy apaman a maipaulog ti Kongreso ken aprobaran ni Presidente Marcos.
Saanmi a pangpangtaan ti asino man --Malakanyang
Iti sabali a bangir, impaganetget dagiti senador ti nangatngato a sueldo dagiti mangmangged gapu iti nguminngina a presio dagiti magatang.
Ilunglungalong ni Senador Juan Miguel “Migz” Zubiri ti pannakaingato ti minimum wage iti ₱200 a singasing ti Kamara wenno iti ₱100 a singasing ti Senado.
Indagadag ni Kabayan Party-list Rep. Ron Salo ti pannakaipasdek ti nailian a minimum wage para kadagiti mangmangged iti pribado a sektor, tapno masigurado a ti polisia iti sueldo ti mangipakita iti pudpudno a kasasaad dagiti gagangay a Filipino.
Impaganetget ni House Speaker Martin Romualdez a ti pudpudno a panangbigbig kadagiti mangmangged ket babaen ti panangipaay iti agpaut a reporma tapno sumayaat ti panagbiag dagiti mangmangged iti pagilian ken iti ballasiw-taaw. (Betheena Unite/Manila Bulletin//Lito Hilidon/Bannawag)
