Nakalasat ti dua ti tawenna nga ubing iti napasamak nga aksidente iti toll plaza ti Subic-Clark Tarlac Expressway (SCTEX) iti Siudad ti Tarlac itay Mayo 1.
Addan iti sidong dagiti kabagianna ti nakalasat nga ubing nga anak ti babai a kameng ti Philippine Coast Guard.
Mapan a 12 ti bilang dagiti natay, a pakairamanan dagiti dadakkel ti ubing, idinto a 37 ti nadangran, iti aksidente.
Lima a lugan ti nagkarambola a pakairamanan ti Toyota Veloz a manmanehuen ni Carlo Mojica a taga-San FErnando City, Pampanga; 18-wheel truck a manmanehuen ni Darwin Cruel a taga-Tondo, Manila; Nissan Urvan; Kia Sonet; ken ti Solid North Bus nga addaan iti numero ti plaka a UVK-941 ken a manmanehuen ni Teodoro Merjan a taga-Malawa, Lingayen, Pangasinan.
Saanmi a pangpangtaan ti asino man --Malakanyang
Segun ken ni police chief ti Tarlac City Lt. Col. Romel Santos, dinungpar ti bus ti uppat a lugan a nakapila iti toll plaza tapno agbayad iti toll. Segun kadagiti report, mapapati a nakaturog ti drayber ti bus.
Nakalugan ti ubing ken dagiti dadakkelna iti Kia Sonet idi napasamak ti trahedia.
Kinuna ti polisia a dida pay masinunuo no nagtugawan ti ubing.
Kaaduan a nadangran dagiti pasahero ken ti drayber ken konduktor ti bus.
Innayon ti polisia a nagkari ti kompania ti bus a tulonganda dagiti biktima iti gastos dagitoy.
Dadduma kadagiti biktima ti agturong iti maysa a children's camp idi mapasamak ti aksidente. (Liezle Basa Iñigo/Manila Bulletin//Lito Hilidon/Bannawag)
