Naipila ti kaso a kriminal kontra ken ni Davao City 1st District Rep. Paolo “Pulong” Duterte a naakusaran a nangdangran ken nangipangta iti maysa a negosiante.
Kinompirmar ni Prosecutor General Richard Anthony D. Fadullon idi Mayo 2 nga addan iti Department of Justice (DOJ) Main ti naidatag a reklamo a maibusor ken ni Duterte.
Segun ken ni Fadullon, isayangkat ti DOJ ti preliminary investigation iti reklamo nga impila ti negosiante ti Davao City a ni Kristone John M. Patria, 37, a nangakusar a dinangran ken pinangtaan ni Duterte, a pananglabsing iti Article 265 ken 282 ti Revised Penal Code (RPC).
Kinuna ni Patria nga am-ammona ni Duterte sipud idi 2024 gapu ken ni Charlie Tan a business partner ti diputado.
Saanmi a pangpangtaan ti asino man --Malakanyang
Segun ken ni Patria, idi Pebrero 23, 2025 iti parbangon, iti Hearsay Gastropub Bar iti Davao City, nakigtot idi kellaat a dinanog, in-headbutt, nagrasrasawan, ken pinangtaan isuna ni Duterte.
Kinuna ni Patria nga idi napasamak daytoy, nabartek ni Duterte ken adda iggem daytoy nga imuko nga indeppel daytoy kenkuana ket impangta ni Duterte a papatayenna ni Patria.
Impasigurado ni Patria nga adda ebidensiana iti napasamak uray saan a napan nagpaagas iti ospital gapu iti amakna a balsen ni Duterte ti pamiliana. Innayon ni Patria nga adda CCTV iti Hearsay Bar. (Jeffrey Damicog/Manila Bulletin//Lito Hilidon/Bannawag)
