Inwaragawag ti New Naia Infra Corp. (NNIC) ti pormal a pakaammo kadagiti agtagikua iti 27 nga eroplano a nabaybay-anen iti general aviation area ti Ninoy Aquino International Airport (NAIA), gapu iti pakaseknan iti kinaepesiente ken kinatalged.
Iti maysa nga statement, kinuna ti NNIC a makiuman daytoy iti Civil Aviation Authority of the Philippines (CAAP) ken iti Manila International Airport Authority (MIAA) a bigbigenda dagiti agtagikua wenno mangibagi kadagiti nabaybay-anen nga eroplano, tapno mapalaka ti pannakaala wenno panangikkat dagitoy.
No awan ti aggunay, ti NNIC ti mangikkat ken mangibelleng kadagitoy nga eroplano, kas mayannurot iti maipakat a paglintegan ken regulasion.
Napaliiw ti NNIC dagiti sumagmamano nga eroplano a saan nga aggargaraw nupay addan nangpadas a mangibelleng kadagitoy, kas koma iti Cessna 421B a nakaparada lattan iti NAIA sipud pay idi 2009.
Saanmi a pangpangtaan ti asino man --Malakanyang
Adda met Boeing 737-200, a mangok-okupar iti 865.52 a metro iti North Taxiway Extension, ti saanen a maus-usar sipud idi 2015.
Sipud panangsublatda iti operasion ken pannakamantener ti NAIA idi Septiembre 2024, kinalikaguman ti NNIC, a supsuportaran ti San Miguel Corp., ti pannakapamoderno kadagiti pasilidad ken mangtaming kadagiti nabayagen a parikut daytoy.
Itay kallabes, imbilin ti Manila Slot Coordination Committee (MSCC) ti in-inut a pannakayallatiw dagiti basbassit a turboprop jets manpud iti NAIA a maipan iti Clark International Airport ken iti dadduma pay nga eropuerto ti rehion. (Dexter Barro II/Manila Bulletin//Lito Hilidon/Bannawag)
