Apo Abogado,
Mannalonkami ditoy probinsiami. Agmulmulakami ti bawang, lasona, ken nadumaduma a natnateng. Gapu ta adu ti agtatakaw ditoy lugarmi, nakairuamanmi iti kabsatko a ni Hector a bantayan ti talonmi tunggal rabii. Kanayon ngamin a matakawankami kadagiti mulami. Adda kalapawmi iti talonmi ket ditoy a maturogkami iti rabii.
Iti maysa a rabii, nakaturogkami ken Hector idi adda simrek iti kalapawmi ket pinaltogandakami a dua. Napuruan ni Hector. Natamaan met ti sakak ken ti bakrangko ket nagimpapatayak. Idi impagarupda a nataykamin, nagsardeng ngarud ti panangpaltogda kadakami. Ngem gapu ta kabus idi ket naraniag ti bulan, nairupaak dagiti dua a nangpaltog kadakami. Tagakabangibangda a barangay ken agdindinamag dagitoy a mannanakaw. Namin-anon a natiliw ken naibaludda ngem makaruarda latta gapu iti panagpiampiansada.
Iti di nagbayag, pimmanaw dagiti nangpaltog kadakami. Inusarko ti selponko ket inkarigatak nga inawagan ni tatang. Immay a dagus agraman kapurokanmi nga immarayat kadakami ket naitaraykami iti asideg nga ospital. Daksanggasat ta saan a nakalasat ni Hector gapu kadagiti adu a tamana. Nakalasatak iti kaasi ti Apo. Imbaga ti doktor a no saanak a naitaray a dagus iti ospital, mabalin a natayak koma gapu kadagiti sugatko ken pannakaawan ti adu a darak.
TULONG ITI MANNALON: All-In-One ti Katuday
Ania ti mabalin nga aramiden ti pamiliami, Apo Abogado? Ania a krimen ti naaramid dagiti mannanakaw a nangpaltog kadakami? Murder kadi? Kayatmi a maikkan iti hustisia ti napasamak kaniak nangnangruna iti kabsatko a ni Hector.—Bernard
Patgek a Bernard,
Ti krimen a murder a masarakan iti Article 248, Revised Penal Code ket nadagdagsen ngem iti ordinario a panangpatay wenno homicide. Adda dagiti sirkumstansia ti maysa a panangpatay a masapul a maaramid tapno agbalin wenno makuna daytoy a murder.
Kayatko nga ipangruna ti dua a sirkumstansia nga adda wenno presente iti panangdangran dagiti nangpaltog kadakayo ken Hector. Umuna ti treachery wenno trinatraydor a wagas a panangpaltogda kadakayo, gapu ta matmaturogkayo idi pinaltogandakayo ket awan ngarud pannakabalinyo a mangdepensa iti bagiyo; ken maikadua, ti evident premeditation wenno ti planado a panangpatayda kadakayo nga agkabsat. Nakalawlawag a babaen dagiti nadakamatmo a sirkumstansia, planado ti panangdangran dagiti mannanakaw a nangpaltog kadakayo.
Ti krimen a naaramidda kenka ket frustrated murder; ni Hector a kabsatmo ket consummated murder.
Tapno nalawag, adda tallo (3) a tukad (stages) ti pannakaaramid ti maysa a krimen (crime). Dagitoy a tukad ket: (1) consummated, a kayatna a sawen nga adda amin dagiti elemento a kasapulan para iti pannakaipatungpal ti maysa a krimen a kas koma iti krimen a consummated murder a naaramid ken ni kabsatmo a Hector gapu ta naipatungpal ti plano dagiti mannanakaw a mangpatay kenkuana;
(2) frustrated, a kayatna a sawen a ti nakabasol ket inaramidna amin tapno maipatungpalna ti krimen ngem saan a naipatungpal maigapu iti banag nga awan iti kontrol ti nakabasol, kas koma ti krimen a frustrated murder a naaramid kenka ta dagiti sugat a nasagrapmo gapu ti pannakapaltogmo ket umanay koma nga impataymo ngem gapu ta naitarayka a dagus iti ospital, naagasanka ket saanka ngarud a natay. Daytoy pannakaitaraymo iti ospital ket saan a kontrolado dagiti nangpaltog kenka, ken;
(3) attempted, a kayatna a sawen a no ti nakabasol ket rinugianna nga aramiden ti krimen a makita babaen dagiti aksionna ngem saan a naaramid ti krimen gapu iti sumagmamano a rason malaksid iti panagbabawi ti nagbasol a mangaramid iti krimen.
Daytoy tallo (3) a tukad iti panangaramid iti krimen a nailawlawag iti ngato ket masarakan iti Article 6, Revised Penal Code:
“Stages in the Commission of Crimes
According to Article 6 of the Revised Penal Code, crimes are classified into three stages:
1. Consummated – When all the elements necessary for its execution and accomplishment are present.
2. Frustrated – When the offender performs all the acts of execution, but the crime is not accomplished due to causes independent of the will of the perpetrator.
3. Attempted – When the offender begins the commission of the crime by overt acts but does not perform all the acts of execution due to some cause or accident other than his or her own spontaneous desistance.”
Manen, ti frustrated murder ket maysa a krimen nga addan kadagiti tukad nga inaramid aminen ti nagbasol dagiti amin nga aksion tapno mapatayna ti biktimana ngem saan a napapatay ti biktima maigapu iti rason nga awan iti kontrol ti nagbasol. Masapul ngarud nga iti frustrated murder, adda intension ti nagbasol a mangpatay iti biktimana ngem saan a natay ti biktimana. Masapul pay nga adda dagiti sirkumstansia a kas koma ti treachery wenno trinatraidor a wagas ti panangpatay ken evident premeditation wenno planado a panangpatay.
Dagitoy nga elemento ti frustrated murder ket nadakamaten iti ngato:
“Elements of Frustrated Murder
To charge an individual with frustrated murder, the prosecution must prove the following essential elements:
1. The offender intended to kill the victim – This intent is crucial and must be established beyond reasonable doubt. Murder is a crime that requires specific intent (animus interficendi) to end a person’s life.
2. The offender performed all the acts of execution – This means that all the necessary acts to bring about the victim’s death were completed. For example, shooting or stabbing the victim in a way that could reasonably result in death.
3. The victim did not die – Despite the offender’s efforts, the victim survives, usually due to timely medical intervention or other factors beyond the control of the offender.
4. Qualifying circumstances are present – The same qualifying circumstances that distinguish murder from homicide must be present, such as treachery or evident premeditation.”
Ngarud ti aramiden, Bernard, mangsapulka iti pagtalkam nga abogado a mangiggem iti ipilam a kaso. Mangaramid daytoy abogadom iti complaint-affidavit maikontra kadagiti mannanakaw a nangpaltog kadakayo para iti kaso a murder gapu ti panangpatayda ken ni Hector a kabsatmo, ken frustrated murder gapu iti dandani panangpatayda kenka.
Maipila dayta a kaso iti Office of the Prosecutor a masarakan iti probinsiayo. Addanto Piskal wenno Prosecutor a mangdengngeg iti kasoyo iti makunkuna a preliminary investigation. No makita ti Piskal wenno Prosecutor nga adda prima facie evidence wenno ebidensia a mangipakita nga adda dakkel a tiansa a makombiktar dagiti nangpaltog kadakayo, yulinto ti Office of the Prosecutor ti darum wenno Information a para iti murder ken frustrated murder iti husgado.—Apo Abogado
(Palagip kadagiti legal a saludsodyo ag-e-mail-kayo ken ni Apo Abogado iti [email protected].)
