Saan a napengdan ni agngayangay a senador ti Alyansa para sa Bagong Pilipinas a ni Diputado ti Las Piñas City Camille Villa a lagipen dagiti nagapuanan daydi lolona bayat ti idadar-ayna iti tinawen a taripnong dagiti kameng ti Freemasons iti Siudad ti Pasay.
Nagpaay ni Villar, a deputy Speaker ti Kamara, a kas Guest of Honor iti taripnong ti Most Worshipful Grand Lodge of Free and Accepted Masons of the Philippines.
Iti mensahena, dinakamat ni Villar dagiti galad ti Mason a kas iti kinatibker, kinasimbeng, kinamanagteppel, ken hustisia - dagiti galad a kunana a napateg iti pannakaibangon ti napigsa ken nalinteg a kagimongan.
Imbinglayna met ti personal a pannakainaigna iti gunglo, ket nalagipna a maysa met a Mason daydi lolona a Dr. Filemon Aguilar, a nangitandudo iti serbisio publiko.
Kabbotos a gobernador ti Cagayan, indagadagna ti panagkaykaysa
Kas panangbigbig iti gapuananna, naipaganan ti Lodge No. 332 iti Las Piñas City ken ni Dr. Filemon C. Aguilar.
Kinuna ni Villar a ti pagtuladan ken galad nga imbati ni lolona ti nangparegta kenkuana a kas maysa a daulo ken public servant. Namnamaenna a matuladna ti kinatibker ken kinamanangaasi ni Aguilar iti panagserbina iti pagilian.
Iti dayta a taripnong, dinayaw ti agngayangay a senador ti nasinged a panagkakabsat iti gunglo, ken ti panangtulongda kadagiti agkasapulan iti pagilian.
