Kas panangtungpalna iti direktiba ti Department of Transportation (DOTr), inwaragawag ti Pangasinan Solid North Transit Inc. (PSNTI) nga insardengna amin nga operasionna kalpasan ti pannakairaman ti maysa a bus-na iti nakaro a road crash iti Subic–Clark–Tarlac expressway (SCTEX).
“Makikikaykaysakami iti pagilian iti pannakipagrikna kadagiti naapektaran iti daytoy a nakalkaldaang a pasamak,” kinuna ti PSNTI iti maysa a statement.
Kinuna ti operator ti bus a “kanayon a ikagkagumaanmi ti agtultuloy a panangipaay iti kasayaatan para kadagiti pasaheromi.”
Innayon ti PSNTI “temporario a nasuspenso” amin a panagbiahe ket nabalakadan dagiti pasahero a kanselarenda dagiti advance booking-da.
Saanmi a pangpangtaan ti asino man --Malakanyang
“Maawatanmi ti kinakaro ti kasasaad, ket responsablekami ken sungsungbatanmi daytoy,” kinuna ti kompania.
Idi Huebes, Mayo 1, dinungpar ti sumiwsiwet a bus ti Solid North ti uppat a lugan iti asideg ti exit toll plaza ti SCTEX iti Tarlac City. Segun iti report, nagdungsa ti drayber idi napasamak ti pannakadungpar.
Segun kadagiti autoridad, 10 ti natay ken 37 ti nasugatan iti nasao nga insidente.
Immunan nga imbilin ni Sekretario ti Transportation Vince Dizon ti pannakasuspenso ti sibubukel a fleet ti PSNTI, nga agarup 300 a bus, bayat nga agtultuloy pay laeng ti imbestigasion.
Kiniddaw pay ni Dizon iti Land Transportation Franchising and Regulatory Board (LTFRB) ti panangipila iti kaso a kriminal kontra iti nasao a kompania ken iti drayber ti bus.
Addan iti kustosia ti polis ti drayber a mabalin a maidarum iti reckless imprudence a nagresulta iti adu a pannakatay, adu a pisikal a pannakadangran, ken adu a pannakadadael ti sanikua.
Tapno malapdan dagiti umasping nga insidente, kinuna ni Dizon nga itultuloy ti DOTr ti komprehensibo a panangrepaso kadagiti agdama a road safety protocol tapno masigurado ti kinatalged ken kinanam-ay dagiti agbibiahe. (Dexter Barro II/MB)
