Insaad ti Philippine Army (PA) ti 16,489 a soldado a pangnayon kadagiti security force a mangsigurado iti natalna ken naurnos a pannakaaramid ti mapasungad a midterm election inton umay a lawas.
Ti PA, a kangrunaan a mangmangted iti puersa iti Armed Forces of the Philippines (AFP) kas pangsuportar iti Philippine National Police (PNP) ken Commission on Elections (Comelec), ti tumulong iti pannakasalaknib iti kinatalged dagiti botante a Filipino a mapan kadagiti 63,663 a presinto a pagbotosan iti entero a pagilian inton Mayo 12 babaen ti panagbantayda iti 661 nga AFP-PNP-Comelec checkpoint iti entero a pagilian.
Kinuna ni Lt. Gen. Roy Galido, Army commanding general, a 6,712 nga opisial ti Army, enlisted personnel, kameng ti Citizen Armed Force Geographical Unity (CAFGU ) Active Auxiliary (CAA), ken reservist ti naibaon a tumulong kadagiti checkpoint ti Comelec.
Mapan a 8,777 dagiti kameng ti Army a naisaad kadagiti pagbotosan, idinto a nakasagana dagiti 12,377 a soldado a mabalin a maibaon no kasapulan.
Saanmi a pangpangtaan ti asino man --Malakanyang
Impaganetget ni Galido ti napateg nga akem ti Army iti panangsalaknib iti demokrasia ti pagilian, kangrunaan kadagiti 34 a lugar nga indeklarar ti Comelec a kas "red areas."
Maibilang a "red areas" dagiti lugar nga addaan iti historia ti mainaig iti eleksion a kinaranggas, nakaro a panagrisiris iti politika, ken adda pangta dagiti rebelde a grupo. (Martin Sadongdong/Manila Bulletin//Lito Hilidon/Bannawag)
