Maysa nga aldaw kalpasan ti panagkiddawna iti resibo dagiti kontribusion ni Bise Presidente Sara Duterte iti pagilian, dinaamag manen ni La Union 1st district Rep. Paolo Ortega V iti bise presidente no ania kadi a a pagilian ti pudpudno a kankanunonganna.
“Sadino a talaga ti yan ti kinapudnona? China wenno Filipinas?" kinuna ni Ortega iti maysa nga statement ita a Lunes, Mayo 5.
"Iti panagkitak, kasla awan ti ammona nga ikampania no di ti makipaset iti politikal a pinniltak a ti temana ket ‘Tiruen ni PBBM ken dagiti kaaliado ti administrasion ngem saan ti China'," kinuna pay ni Ortega.
Segun iti Ilokano a diputado, agrikrikus ni Bise Presidente Duterte "a mangtirtiro iti dandani amin, ngem saan a pulos iti China."
"Nalawag a no maipanggep iti Beijing, ulimek ti ipakpakatna. Nakaro ti kinaulimekna no madakamat ti banag a maipanggep iti pananguk-ukopar ti China iti bukodtayo a paraangan. Kas iti kinaulimek ti tanem a dagiti bibigna ket nasiperan ken seliado," impaganetget ni Ortega.
Pannakaimbestigar ti napasamak iti Senado, imbilin ni Presidente Marcos
Para iti House deputy majority leader, ti panagulimek ni Duterte kadagiti isyu a mainaig iti China ket "ipaduyakyakna ti panangpanuynoy."
“Awan pay ti nangngegtayo nga uray maysa a sao manipud kenkuana. Ngarud, no ipatarusko dayta, mabalin a posible unay a kaipapananna ti ‘it’s a go for China’ no isuna ti maseknan,” napaliiw ni Ortega, a nanginayon a "kaaduanna a ti kinaulimek, kaipapananna ti wen.”
“Manen, yan ti patriotismo ditoy? Masapul kadi a dumngeg wenno mamatitayo iti maysa a tao a ti interesna ket eksakto a kasungani ti 75 a porsiento kadagiti Filipino a maibatay iti kaudian a surbey ti Social Weather Stations, ket mabalin a para iti Team Filipinas!" kinunana a dakdakamatenna ket dagiti para senador iti supsuportaran ni Presidente Marcos nga Alyansa para sa Bagong Pilipinas.
Mairaman kadagiti isyu a naipadamag a nagulimek ni Duterte ket ti panangsakup ti China iti Sandy Cay, maysa a sand bar nga uppat a nautical miles laeng manipud iti Pag-asa Island a teritorio ti Filipinas.
“No ditay' mapangnamnamaan ni VP Sara a mangidepensa kadatayo iti foreign bullying, kasanotayo a namnamaen nga itandudona ti interes dagiti Filipino?” sinaludsod ni Ortega.
Idi Domingo, Mayo 4, dinamag ti kongresista iti nai-impeach a bise presidente: "Ania kadi a talaga ti naitulongmo iti pagilian a kas Bise Presidente? Imbes a tumulong, kas man bin-ig a riribuk ken pananglikliklik ti kontribusionmo." (Ellson Quismorio/MB)
